Asturies celebra esti domingu San Xuan cola tradicional quema de fogueres y l'engalanamientu de fontes

Na medianueche d’esti domingu cientos de fogueres van quemar n’Asturies pa celebrar San Xuan. La nueche más máxica del añu va trayer un abanicu grande d’opciones pa disfutar d’una de les cites más esperaes polos asturianos.

La mayoría de ciudaes y pueblos del país –y munchos barrios– tienen preparaes pa esta nueche fogueres pa celebrar el solsticiu de branu y quemar los augurios malos. Una tradición de raigaños celtes, l’Alban Heruin, entovía mui viva n’Asturies, que ye un cultu al sol y al agua al traviés del engalanamientu de fontes, y una nueche máxica na que ye posible desencantar a una xana que sal de la so cueva o garrar una flor d’agua na salida de los primeros rayos de lluz.

La foguera más multitudinaria ye la qu’entama’l Conceyu de Xixón na sablera d’El Natahoyo, que se completa con actuaciones musicales a lo llargo de tol día. A les 13 hores van actuar dellos grupos folclóricos en dellos puntos de la ciudá: Xaréu, na Plaza Italia; La Flor de Xaranzaina, na Plaza’l Marqués; La Alegría, nos Xardinos de la Reina; y Los Collacios, na playa de L’Arbeyal. Mentes, a les 19 hores, na Plaza Italia, va ser el turnu d’Excelsior. La celebración nuecherniega va principiar a les 21 hores col enramáu de la fonte de Pelayu, a la que van siguir les actuaciones de la Banda Gaites Noega (Plaza Mayor) y de la Banda Gaites Villa de Xixón (Xardinos de la Reina), a les 22.15 hores, pa depués facer dambes un pasucais hasta la sablera d’El Natahoyo, onde espera El Koku la Manzana pa dar un conciertu a partir de les 23 hores. A medianueche, tres la quema de la foguera, el llanzamientu de fueos artificiales y el baille de la danza prima, va ser el turnu de La Bandina.

Otra cita con gran influencia de visitantes y muncha tradición ye la de Corvera, en Tresona. La folixa principia a les 18.30 hores con Pasito Show, pa depués dar pasu a la Nueche Celta, que nesta ocasión va contar cola participación d’Anabel Santiago (22.30 hores), la representación de ‘La quema del cuélebre’ por parte de Nun Tris (23.30 hores) y l’actuación d’un grupu clásicu nesta celebración, Dixebra (00.30 hores). Va zarrar la fiesta’l festival de música electrónica Korvera Suena, na carpa del horru a partir de les 2 hores.

Na foguera de Candás la música va ponela Xera, tres l’ésitu del domingu col so espectáculu ‘Llume 5.1’ nel Teatru Campoamor, a les 23 hores n’El Muelle. Mentes, en L’Entregu, el Centru Social Autoxestionáu La Semiente entama otru añu más la so celebración al llau del campu fútbol, que va principiar pela mañana col enramáu de les fontes del pueblu. Pela tarde, a les 18 hores, van principiar los xuegos tradicionales y el pasucais de cabezudos y de seres mitolóxicos. Yá a la medianueche, tres la quema de la foguera, el baille de la danza prima y una queimada popular, va actuar La Bandina La Curuxa. Dende La Semiente informen que les perres recaudaes na folixa van destinase a la merca de material escolar pa la xente necesitao.

L’Asturiana Mining Company va ser el grupu encargáu de poner la folixa na foguera de Nava, mientres que na de La Felguera va facer lo propio La Cirigüeña (21 hores). Pela so parte, como ye vezu, la celebración de la playa La Espasa, en Caravia, pasa al sábadu coles actuaciones de la bandina Degañan’s y del grupu de pop-rock Avalle Van.