Asturies celebra con numberoses actividaes el Día Internacional de la Llingua Materna

Esti xueves, 21 de febreru, celébrase’l Día Internacional de la Llingua Materna en tol mundu, dedicáu esti añu a les llingües indíxenes, y Asturies nun ye esceición. El país acueye diverses actividaes per tola so xeografía, sobre manera en centros escolares.

La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistaní –qu’ocupaba’l país– nuna manifestación en Dhaka pola defensa de la llingua bengalí. El primer Día Internacional de la Llingua Materna foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.

Esti 2019 ye l'Añu Internacional de les Llingües Indíxenes, polo que’esta xornada, como nun podía ser d’otra forma, mira pa estos idiomes en peligru de desaniciu que contribúin “a la rica diversidá cultural del nuesu mundu”. “Los pueblos indíxenes representen aproximadamente a 370 millones de persones que falen la mayoría de les 7.000 llingües vives. Hasta’l día de güei, munches d’elles sufren marxinación y discriminación, estrema probeza y violaciones de los derechos humanos”, esplica Audrey Azoulay, direutora xeneral de la UNESCO, que convida esti Día Internacional de la Llingua Matera “a tolos estaos miembros, los nuesos asociaos y les partes interesaes na educación, que reconozan y faigan efeutivos los derechos de los pueblos indíxenes".

Teatru en Candás

El Gobiernu, al traviés de la Direición Xeneral de Planificación Llingüística y Normalización, entama con motivu d’esta celebración una representación teatral en collaboración col Conceyu de Carreño. Trátase de la obra d’Adolfo Camilo Díaz ‘Muyeres Inesperaes’, a cargu de la compañía Ververemos, dende les 20 hores nel Teatru Prendes de Candás.

Enantes, ayeri programó en Cangas del Narcea la obra ‘Hansel y Gretel’, na versión de la compañía Higiénico Papel Teatro que resultó obra ganadora del II Premiu y Festival Nel Amaro de Teatru Profesional n’Asturianu y Gallego-asturiano, pa los escolinos del conceyu.

Nel restu del país

Coincidiendo con esta xornada, la Conseyería d’Educación y Cultura propón la llectura d’un manifiestu nos centros educativos que cuenta tanto con versión n’asturianu como en gallego-asturiano. D’igual forma, yá de manera individual, la gran mayoría escueles y institutos van entamar actividaes venceyaes cola llingua materna.

Ente ellos destaca la presentación que se va facer a les 11.30 hores na Escuela Infantil El Nieru, de Colunga, de la campaña de fomentu del asturianu na etapa de 0 a 3 años que desendolca’l Serviciu de Normalización Llingüística de la ‘Comarca de la Sidra’ y qu'esta mesma selmana tamién dio a conocer el de Cangas del Narcea. Ésta inclúi material específicu adaptáu a estos niveles qu'ayudará a los neños y neñes a diferenciar los nomes de los distintos animales de la casería, y será completada por una programación de sesiones de cuentacuentos a cargu del responsable del SNL, Pablo X. Suárez.

Tamién los conceyos entamen eventos pa güei, como ye’l casu de Villaviciosa. A les 18.30 hores na Casona de los Hevia’l Conceyu va entrega los premios del II Concursu de Rellatos Curtios ‘Xosé Caveda y Nava’, que llevó José Ángel Gayol con 'Tolo que sé sobre toles coses', a lo que va siguir la presentación del númberu nuevu de ‘Friuz’ y un conciertu de Xaime Martínez colos cantares del so trabayu ‘Ósculos d’agua nel Imperiu Asturianu’, editáu por Araz –empresa editora tamién d’Asturies.com–.

En Xixón, mentes, tamién va facese una entrega de premios. Nesti casu trátase de la del I Concursu ‘Xixón Fala en 3’, nes sos dos estayes, que va tener llugar a les 18.30 hores na Casa Natal Xovellanos.