Asturies celebra’l Día de les Lletres Asturianes con actividaes per tol país

Asturies vive’l Día de les Lletres Asturianes con delles actividaes a lo llargo de tol país y con descuentos del 10 por cientu na merca de llibros y discos n’asturianu. L’ALLA tresllada’l so actu académicu al Teatru Filarmónica.
 
Otra novedá d’esti añu del eventu qu’entama tolos años la institución con motivu d’esta fecha ye l’ausencia del nomamientu d’un Académicu d’Honor. Por contra, l’Academia de la Llingua Asturiana (ALLA) convida a dellos axentes sociales a falar sobre ‘Llingua asturiana y futuru’. Asina, nel actu van participar Paz Rendueles, vicerrectora d'Investigación de la Universidá d’Uviéu; Lisardo Lombardía, direutor del Festival Interceltique de Lorient/An Oriant; Pedro Suárez, matemáticu y profesor; Pilar Rubiera, periodista especialista en temes culturales; Ricardo Saavedra, músicu y escritor; y Luis Arias Argüelles-Meres, caderalgu d'Enseñances Medies.
 
Sonia Avellaneda y Próspero Morán van ser los presentadores d’esti eventu, que va principiar a les 20.30 hores cola actuación musical de Xuan Nel Expósito, col acordión, y Marisa Valle Rosso. Darréu van intervenir les persones convidaes pola ALLA, pa continuar col discursu institucional d’Ana María Cano, presidenta de la institución académica. Pa zarrar l’actu, va lleese una esbilla de poemes y va tocar dellos temes la Banda Gaites Villaviciosa.
 
Descuentos del 10 por cientu
 
Toles persones que merquen güei un llibru o un discu n’asturianu van tener un 10 por cientu de descuentu y van recibir de baldre’l llibru ‘Al rodiu de la poesía ilustrada’, volume coordináu por Juan Carlos Villaverde Amieva y Javier González Santos, profesores de la Universidá d’Uviéu y miembros del Seminiariu de Filoloxía Asturiana. Los establecimientos que celebren el ‘Día del llibru n’asturianu’ son: Antares, Aldebarán, Cervantes, El Corte Inglés, Diocesana, Garluc, Maribel, Ojanguren, La Palma, II Milenio, Pintar-Pintar, Polledo, Puntos, Reconquista, Santa Teresa y Servitec (Uviéu); Bardos, Casa del Libro, Central, Cornión, El Corte Inglés, English Book Shop, Hernández, Paradiso, Mundo Sonoro, Roy y Zifar (Xixón); Azucel, Casona, Clarín, El Corte Inglés, Víctor Núñez, La Vieja Atalaya y Tienda Elepé Productions (Avilés); Disco 55, Mercantil, La Pilarica y La Torre (Mieres); Eroski de Parque Principado, FNAC, Naredo y San Vicente (Siero); Treito (Cangas del Narcea); Imagen (Cangues d’Onís); Mario (Corvera); Sol (Samartín del Rei Aurelio); Rima (Piloña); Clarín (Llanes); A. Pantiga (Llangréu); Arvín (Llaviana); Helas (Valdés), Gestión (Parres) y Muséu de la Sidra (Nava).
 
Amás, dientro de les actividaes institucionales por mor del XXXIII Selmana de les Lletres Asturianes, va celebrase un actu escolar esti meudía en Vega (Sariegu), nel Colexu Públicu Salvador Vega Berros, nel que van participar autoridaes y los neños y neñes de la escuela. Asina, va haber actuaciones, una esposición entitulada ‘La llingua na historia’ y van entregase los premios del XVII Certame de Poesía y Dibuxu, del IX Certame de Cartelismu y del I Certame de Creación Audiovisual. Yá pela tarde na Casa la Cultura de Santalla d’Ozcos, a partir de les 19.30 hores, ta prevista la conferencia ‘De las señas da Ilustración na Asturias occidental’ por José Antonio Álvarez Castrillón, de la Universidá d’Uviéu.
 
Lletres de pan na Mancomunidá de La Sidra y llibros de baldre n’occidente
 
Escueles, partíos políticos, coleutivos y servicios de normalización llingüística de los conceyos asturianos lleven tola selmana entamando actividaes al rodiu d’esta celebración añal alredor de la lliteratura asturiana. Asina, nes clases d’asturianu de Primaria y Secundaria, los profesores trabayaron p’averar la creación lliteraria nel nuesu idioma a los escolinos y n’especial, nel periodu de la Ilustración, con poetes como Benito de l’Auxa y Antón Balvidares, a los qu’esti añu ta dedicada la Selmana de les Lletres. Güeí, Día de les Lletres Asturianes, munchos colexos entamen actividaes fuera inclusive de les clases de Llingua Asturiana.
 
Tamién los ciudadanos pueden ser partícipes d’esta celebración. Asina, atopamos iniciatives como la del Serviciu de Normalización Llingüística de la Mancomunidá de La Sidra, que reparte xunto a l’Asociación La Compaña de Ronchel, lletres de pan per Villaviciosa, Colunga, Nava, Cabranes, Bimenes y Sariegu, llugar onde nació Balvidares. “Les lletres de pan, acompañaes por un poema y una breve reseña biográfica de Balvidares, repartiránse per escueles, institutos, cases de cultura, ayuntamientos y chigres de los seis conceyos qu’integren la mancomunidá, polo que l’aición tendrá un impautu social apreciable y la nuestra lliteratura tendrá un nivel de difusión nesti día muncho más altu del acostumáu”, espliquen dende’l serviciu de normalización.
 
Mentes, nel occidente, la Oficina de Coordinación Cultural y Llingüística del Parque Histórico del Navia entama ‘Al son das lletras’, activiá que reparte de baldre un fexe d’obres escrites en gallego-asturiano pa celebrar esta xornada. Los llugares onde poder recoyer los llibros son los siguientes: Biblioteca Pública de Bual (a partir de les 17 hores); Biblioteca Pública y Oficina de Turismu de Cuaña; Escola Pública d’Eilao; Biblioteca Pública d’El Franco; Museo del Chao Samartín en Grandas de Salime; Biblioteques Públiques Carlos Peláez de Navia y Xovellanos de Veiga; Muséu Etnolóxico de Pezós; Biblioteca Pública y Oficina de Turismu de Tapia; y Casa Conceyo y Telecentro (a partir de les 15 hores) de Villayón.