Asturies celebra’l Día de la Nación

El país vive una fecha especial. Ye 8 de setiembre y celébrase per tol territoriu'l Día de la Nación Asturiana. Uviéu acueye una manifestación xunitaria entamada pola izquierda soberanista, mentes que los actos oficiales desendólquense en Candás.

L’Espaciu La Llegra coordina la cita uviedina organizada al traviés d’asamblees abiertes nes que participaron organizaciones y persones a títulu individual de la izquierda soberanista col oxetivu de dar la continuidá a la iniciativa #LluchandoPolaSoberanía y salir a la cai de manera conxunta esti Día d’Asturies. Formaciones polítiques, sindicatos y coleutivos sumáronse a esta xornada que se va componer de una manifestación y una xinta popular con actividaes, y que va celebrase baxo’l nome ‘Pa tresformar Asturies: #LluchandoPolaSoberanía’. Compromisu por Asturies, Conceyu Abiertu, Darréu, Iniciativa Comunista d’Asturies, Asamblea de Para@s y Precari@s d’Asturies, Comité Asturianu de Solidaridá cola Ucrania Antifacista, Corriente Sindical d’Izquierda, Plataforma Feminista d’Asturies y Xunta Estudiantil Asturiana conformen la llista d’organizaciones que sofiten la convocatoria, a la que tamién se sumó ayeri Andecha Astur.

“Decidimos salir a la cai porque’l Gobiernu asturianu celebra un 8 de setiembre d’autopropaganda y autoconsumu, vendiendo una imaxe d’Asturies falsa y ficticia, y nós creemos que nun hai munchu que celebrar y sí muncho que reivindicar”, apuntaron dende La Llegra na presentación énte los medios de la programación pal Día d’Asturies. La salida de la marcha ta prevista pa les 12.30 hores del Paséu de Los Álamos, con un percorríu con cuatro paraes onde va reclamase “la soberanía pa decidir y pa camudar les polítiques en base a cuatro exes: mocedá y educación, llaboral y derechos sociales, xéneru y llibertaes sexuales, y ecoloxismu y mundu rural”. El final va tar asitiáu na Plaza’l Paragües, onde va tener llugar un actu políticu, una xinta popular, actuaciones musicales, la instalación d’un mercadín d’editoriales y coleutivos sociales, xuegos tradicionales y cuentacuentos pa neños y neñes, actividaes  toes elles de baldre, a esceición de la comida.

El Partíu Asturianista (PAS) tien previsto celebrar el Día d’Asturies con un homenaxe a Pelayo, “fundador del Estáu asturianu”, na so estatua asitiada na xixonesa plaza’l Marqués (12.30 hores). La xornada va continuar con una xinta de xeremandía ente militantes y simpatizantes. Pela so parte, Izquierda Xunida (IX) celebra un actu en Sobrescobiu nel que participa Cayo Lara, coordinador federal de la coalición; el coordinador xeneral, Manuel González Orviz; y el coordinador municipal, Ovidio Zapico. Víctor Suárez, coordinador de la estaya ‘Faciendo país’ d’IX, va encargase de la presentación del eventu, que va tener llugar nel Centru Cultural Vicente Álvarez (El Pedrusu, Rusecu) a partir de les 13 hores. La organización tamién entama una comida d’hermanancia.

El Día d’Asturies oficial, en Carreño

Esti añu la celebración entamada pol Gobiernu va tener llugar en Candás, villa que toma’l relevu de Villaviciosa. Les actividaes van principiar a les 11 hores cola nomada ‘Marcha nórdica’, con salida y final na plaza La Baragaña, pa depués dar turnu a los deportes tradicional en Les Conserveres (de 11.30 a 17.30 hores) y actividaes náutiques nel Muelle (de 11.30 a 14.30 hores y de 16 a 19 hores), asina como una escuela de bolos nel parque Santarúa (de 12 a 14 hores). Tamién va haber espaciu pa xuegos infantiles en La Baragaña, llugar onde va desendolcase una exhibición de pita pinta asturiana (dambes actividaes de 12 a 14.30 hores y de 17 a 20 hores).

El teatru va tener el so güecu a les 12.30 hores cola representación del espectáculu ‘Llumeru’, de Factoría Norte, na zona onde va asitiase’l Mercáu Tradicional y Feria de Productos Asturiana, nes cai Braulio Bustos y en La Baragaña (abiertu de 12 a 21 hores). La Banda Música de Candás va actuar a les 13 hores na fábrica antigua d’Ortiz, mentes qu’a les 17 hores va haber una Danza Prima y una actuación coral na plaza Hermanos Helio, mesma hora na que va dar aniciu una partida de batiente en Santarúa y na que va celebrase otra ‘Marcha Nórdica’. A les 18 hores va ser el turnu del Coro de la Bodega en Les Conserveres, pa dar pasu depués a una amuesa de folclor asturianu a cargu de La Folixa (19.30 hores) n’El Paseín y en La Baragaña. La Coral Polifónica Aires de Candás va dar un conciertu a les 20 hores nel Teatru Prendes y Nuberu va encargase a poner el ramu al Día d’Asturies a les 21 hores en Les Conserveres.