Asturies celebra’l Día de la Nación

Ye 8 de setiembre y el país celebra’l Día de la Nación Asturiana. Villaviciosa acueye la fiesta oficial nuna xornada que destaca pola convocatoria d’una manifestación xunitaria en Xixón entamada por partíos nacionalistes d’izquierda.

 

Asina, Compromisu por Asturies, Conceyu Abiertu y Andecha Astur salen xuntos per primer vegada a la cai nun Día de la Nación Asturiana nuna convocatoria na que tamién se suma Izquierda Anticapitalista. La cita va tener llugar na Plazuela San Miguel a les 12.30 hores y cuenta col sofitu de la Corriente Sindical d’Izquierda (CSI), Darréu, el Centru Social Autoxestionáu La Semiente, la Xunta Estudiantil Asturiana y el Sindicatu Unitariu y Autónomu de Trabayadores de la Enseñanza d’Asturies (SUATEA). El lema de la marcha ye ‘Asturies decide: pola soberanía y el cambiu social’. Tres la mesma, les cuatro formaciones polítiques tiene previstes xintes xunto cola so militancia en dellos establecimientos de la ciudá.

 

Pela so parte, el Partíu Asturianista (PAS) tien previsto celebrar el Día de la Nación Asturiana con un actu en Santuyanu (Bimenes) n’homenaxe a la minería. Asina, a les 12.30 hores, responsables políticos y militancia van facer una ufrienda floral frente al Monumentu al Mineru, recordando asina “l'importante papel de les families mineres y la minería na historia d'Asturies y na cultura asturiana”. Según señalen dende’l PAS, esti xestu tien un relieve especial nun momentu “nel que’l PSOE y el SOMA olvídense del tradicional actu de memoria y cultura minera de Rodiezmu”. Darréu, va entamase una visita cultural al Palaciu Martimporra y al Muséu la Radiu, pa finar la xornada con una xinta de xeremandía.

 

 

Esti añu la celebración entamada pol Gobiernu va tener llugar en Villaviciosa, villa que toma’l relevu de Tinéu. Les actividaes van principiar al meudía con una exhibición de deportes tradicionales a cargu del Grupo Perlora na Plaza’l Güevu y una actuación de la Coral Capilla de la Torre nel parque d’El Pelambre. Ési mesmu llugar va acoyer, a les 13 hores, un conciertu de tonada. Pela tarde, a les 16 hores, la Plaza’l Güevu va ser sede de más deportes tradicionales, nesta ocasión entamaos por Seis Conceyos. Un pasucais de la Banda de Música de Villaviciosa (17 hores) y del Grupo Folklórico Villaviciosa Aires de Asturias (18 hores) completen les actividaes vespertines enantes del entamu de les actuaciones musicales nes escenariu principal. Nél, el públicu maliayu y visitantes van poder ver a Anabel Santiago (19 hores), Taranus (20 hores), Paula Rojo (21 hores) y Alfredo González (22.45 hores), que va dar un conciertu especial nel que van collaborar Nacho Vegas, Miguel Herrero, Silvia Quesada (Tejedor), Pablo Moro, Ivo Pérez (Muñeco Vudú) y Rubén Pozo.

 

A estes actividades hai que sumar les programaes pola Fiesta de la Sidra, qu’entama’l Conceyu de Villaviciosa, y el VIII Festival Intenacional de la Gaita, organizáu pola Banda Gaites Villaviciosa-El Gaitero. Esta formación amosó’l so malestar pola actitú del Gobiernu al atribuyise nun primer momentu l’entamu del certame, lo qu’obligó al departamentu de prensa del Executivu a rectificar darréu.