Asturies celebra’l Día de la Nación

Esti sábadu, 8 de setiembre, Asturies celebra’l Día de la Nación Asturiana. Coincidiendo con esta fecha simbólica, los partíos asturianistes entamen dellos actos políticos en Perlora, L’Entregu y Xixón.

 

Compromisu por Asturies, formación de creación nueva impulsada pol Bloque por Asturies, Unidá Nacionalista Asturiana (UNA) y dellos independientes col oxetivu d’axuntar a tol asturianismu, organicen pal so primer Día de la Nación Asturiana un actu políticu destináu a militantes y simpatizantes. Ésti va tener llugar nel Llagar del Restaurante Casona El Carmen de Perlora, nel conceyu de Carreño, onde UNA-Bloque tien representación municipal. Les intervenciones polítiques van principiar a les 12.30 hores, cola participación de Yolanda Huergo, vocera de la federación de partíos, y del edil Roberto Holgado, pa depués continuar con una espicha.

 

Nun comunicáu, Huergo señala que “el 8 de setiembre tien de ser un día pa recordar qu'Asturies, nel actual contestu de crisis, tien seriamente amenaciáu'l so futuru, yá qu'a la crisis económica estructural que sufrimos nos postreros 30 años, a los continuos ataques a la identidá asturiana y a la condición subordinada y periférica a la que se nos condergó, súmase la nueva involución xeneral de derechos sociales, llaborales y económicos qu'amenacien con convertir definitivamente Asturies nun país esmanteláu nel que l'únicu futuru sía la emigración xeneralizada a la que yá se vieron espuestes delles xeneraciones de la nuesa mocedá”. Tamién sollertó “sobre la involución que supón la nueva fola recentralizadora que busca la uniformización del Estáu y de la
poca capacidá de respuesta social y política que tenemos n’Asturies ante esta reactivación d'un discursu retrógradu y antidemocráticu”. Por último, la vocera de Compromisu afirmó que la formación de creación nueva ta trabayando “por qu’esti 8 de setiembre marque l'entamu d'un cursu políticu nel que se consolide una alternativa pensada dende, por y p’Asturies, que consiga crear un polu referencial de discursu, aición, movilización ya influencia que nos dexe voltiar una situación na que verdaderamente poco hai que celebrar”.

 

L’Entregu foi’l sitiu escoyíu por Conceyu Abiertu pa celebrar esta xornada, convocatoria a la que tamién se sumó Darréu y Andecha Astur recién. La plataforma d’eleutores, que l’añu pasáu entamó una manifestación n’Uviéu, decidió nesta ocasión entamar un actu políticu y delles actividaes nel parque de La Llaguna que van dende los xuegos tradicionales a la música del país. Les intervenciones polítiques tán previstes pa les 14 hores, a les que va siguir una xinta popular. “L’ochu setiembre ye un día pa recordar qu’Asturies ye una nación y que como tal tien unos derechos. Tenemos que criticar necesariamente al Gobiernu asturianu nel día de tolos y toles asturianos y asturianes porque escaez facer lo más importante: tien que reivindicar políticamente Asturies y les sos instituciones, que s’atopen baxo amenaza del centralismu español; tien que recordar que somos una nación histórica europea que tien derechu al autodetermín y que nestos momentos d’imposiciones, de recortes, d’ataques a la yá de por sí curtia autonomía que tenemos, d’amenaces a los conceyos y mancomunidaes y de desaniciu de lo público, ye precisamente cuando con más puxu tenemos que desixir al Gobiernu d’Asturies qu’actúe como tal; que dexe de ser cómpliz y que mos defienda”, señalen dende Conceyu Abiertu.

 

Pela so parte, Andecha Astur, nun comunicáu, llamenta “que depués de cerca de 20 años de movilización ininterrumpío nel Díi de la Nación Asturiana, dexe de realizase esti añu, precisamente nunos intres nos que más necesario ye una respuesta en clave asturiana y d’izquierda a les polítiques del Estáu español sobre Asturies”. Nél esplica que renuncia a convocar nengún actu en solitariu y que decide amiestase a la convocatoria fecha por Conceyu Abiertu en L’Entregu, pa depués facer un llamamientu “al conxuntu de formaciones polítiques y sociales asitiaes nel ámbitu del nacionalismu asturianu a qu’aprofiten la cellebración del Díi de la Nación Asturiana pa reflexonar sobre la necesidá de superar l’actual situación de desunión esistente que mos impide responder cola fuercia precisa a les continues agresiones nel tarrén social y nacional de les que somos oxetu por parte del Estáu español”.

 

Pela so parte, el Partíu Asturianista (PAS) tien previsto homenaxear a Pelayu na Plaza’l Marqués de Xixón “como fundador del Estáu asturianu, que da forma política a la nacionalidá asturiana, y como creador y xerme de la Europa actual”. Militantes y simpatizantes van facer una ufrienda floral a les 13 hores y, darréu, van desplazase a Pión pa facer una xinta de xermandía nel restaurante El Pinal.

 

La celebración oficial, en Tinéu

 

La villa de Tinéu toma’l relevu d’Amieva como llugar de celebración de les actividaes programaes por Gobiernu pa celebrar el ‘Día d’Asturies’. Éstes van principiar al meudía cola apertura d’un mercáu tradicional, xuegos infantiles y una amuesa de deportes tradicionales, ente otros. A les 12.30 hores va haber un conciertu de tonada entamáu pola Asociación de la Canción y el Folklore Valle del Nalón y l’Asociación d’Interpretes de la Canción Asturiana (AICA), y yá de tarde-nueche, la música va siguir teniendo protagonismu coles actuaciones de Distrito 48 (18 hores), Roke (19.15 hores), Rafa Lorenzo (20.30 hores), Asturiana Mining Company (21.45 hores) y Doctor Explosion (23 hores).