Asturies, Castilla y Lleón, y Aragón presenten una demanda ante la XE pa defender el carbón

Los tres territorios recurrieron ante’l Tribunal Xeneral de la Xunión Europea (XE) el reglamentu comunitariu d’ayudes al carbón. D’esta forma defienden la producción de carbón autóctonu más allá del añu 2018.
 
El reglamentu comunitariu, aprobáu nel mes d’avientu del 2010, cuenta con dellos artículos qu’obligen a les empreses a pesllar nel 2018 o devolver les ayudes europees recibíes nel casu de querer continuar cola so actividá, amás de reducir de manera progresiva les sovenciones estatales a la estraición del mineral. Ésta ta establecida nun 25 por cientu nel 2013; un 40, nel 2015; un 60, nel 2016; y un 75, nel 2017. Les tres comunidaes quieren eliminar estes obligaciones.
 
El testu común foi aprobáu esti llunes col oxetivu de defender el carbón autóctonu y contó cola ausencia de la firma de Castilla-La Mancha, territoriu que tamién cuenta con empreses mineres. La Junta de Castilla y Lleón, en manes del PP, emitió amás un comunicáu onde criticó la postura del Gobiernu Estatal por “non desarrollar nenguna aición pa defender el carbón” a plazu llargu.