Asturies bate'l récor de turistes recibíos nun mes de mayu

Sumó 164.354, un 3,1 por cientu más que nel mesmu mes del 2008, hasta agora'l que rexistraba más visites con 159.447 turistes. Tamién medró'l númberu d'estranxeros que s'averaron a conocer el país, con una medría del 14,1 por cientu.

Según los datos espublizaos ayeri pol Institutu Nacional de Estadística (INE), Asturies allugó en mayu 10.124 turistes más que mientres el mesmu mes del añu pasáu, lo que supón un aumentu del 6,6 por cientu. El númberu d'estancies, mentes, creció un 8,9 por cientu al respeutive del 2015 y llegó a les 316.007.

Nos cinco primeros meses del 2016, Asturies recibió 591.789 viaxeros, un 5,7 por cientu más que nel mesmu periodu del 2015, y rexistró un 7,7 por cientu más de nueches d'estancia, con 1.149.205. La llegada de visitantes internacionales caltiénse tamién al alza, yá qu'en mayu llegaron un total de 37.955, un 14,1 por cientu más que l'añu anterior, y xeneraron 66.715 estancies, un 25,5 por cientu más que nel 2015.

No que va d'añu, la llegada d'estos turistes procedentes d'otros estaos aumentó un 13,5 por cientu hasta contabilizar 81.036, mentes que'l númberu d'estancies creció un 23,9 por cientu. Los datos del INE muestren tamién una medría del 1,1 por cientu nel númberu de persones emplegaes nos agospiamientos turísticos del país al respeutive de mayu del 2015.