Asturies ayuda en Mozambique, Nixeria, Venezuela, Xerusalén este y Saḥara Occidental

|
Comisión de coordinación del conveniu ente Aecid y comunidaes autónomes en Cantabria

Participa na financiación de cinco proyeutos humanitarios xunto a l'Agencia Española de Cooperación Internacional para el Desarrollo (Aecid), ún en collaboración con NN XX.

Asturies súmase a esta iniciativa xunto con Galicia, Cantabria, La Rioja, Murcia, Comunitat Valenciana, Canarias, Illes Balears, Madrid y Castilla y Lleón apurriendo 50.000 euros, al igual que l'añu pasáu, mentes qu'Aecid pon al rodiu d'un millón. El presupuestu global pa estos proyeutos d'aición humanitaria d'esti 2019 algama 1.300.000 euros.

D'ellos 300.000 van pa una intervención cola población abellugada saḥarui pa cubrir necesidaes básiques d'alimentación y nutrición de 133.672 persones, mesma cantidá destinada a l'asistencia a la población nixeriana abellugada en Maradi (Níxer) énte'l conflictu intercomunitariu nos estaos de Sokoto, Zambara y Katsina en Nixeria. Los otros dos proyeutos reciben 250.000 euros: meyora del accesu de muyeres y neñes vulnerables a servicios multisectoriales pa la eliminación de la violencia de xéneru en Xerusalén Este y sofitu al accesu a una educación inclusiva y de calidá en Miranda (Venezuela) p'asegurar la permanencia nes escueles de neños, neñes y adolescentes.

El conveniu cola Aecid afita tamién un fondu de continxencia pa la so activación énte una emerxencia sobrevenida. Nesti contestu, alcordóse destinar anguaño 250.000 euros al Programa Mundial d'Alimentos de Naciones Xuníes p'ayuda d'emerxencia a Mozambique por causa de la situación xenerada pol tifón Idai.

Esta campaña nel país africanu empresta asistencia inmediata a 500.000 persones afectaes y lidera la respuesta a esta crisis en materia de telecomunicaciones d'emerxencia, col oxetivu inmediatu de restablecer les redes esenciales pa sofitar les operaciones de socorru.

Na semeya, conceyu de la Comisión de Coordinación del conveniu ente Aecid y comunidaes autónomes celebrada en Cantabria.

 

Contador Estadistiques