Asturies aumenta les conexones con Londres a quinces selmanales

La ruta nueva d'Iberia Express nel Aeropuertu d'Asturies con vuelos a Heathrow, y la que va abrir Vueling con Gatwick, amplíen les conexones con Londres a quince selmanales. Asturies aprovechó esti miércoles pa promocionase na capital británica.

Iberia Express punxo en marcha l’enllaz d’Asturies con Londres el domingu y va operar vuelos ente dambos aeropuertos trés díes a la selmana: los martes, xueves y domingos. Éstos van salir de Santiago'l Monte a les 18.20 hores y del aeródromu londinense a les 20.30 hores, y van tener precios dende 33 euros por trayeutu si se merca dir y volver. Amás, esta ruta va dexar coneutar Asturies cola rede internacional de British Airways Heathrow, dando la posibilidá de coneutar con destinos de tol mundu.

Pela so parte, EasyJet, aerollinia que vien cubriendo la ruta cola capital británica dende hai diez años, tien siete conexones selmanales col aeropuertu de Stansted y Vueling yá comercializa los billetes pal vuelu que va aunir l'aeropuertu con Gatwick, cinco díes a la selmana, a partir del martes que vien.

Promoción nel Reinu Xuníu

El conseyeru d’Emplegu, Industria y Turismu, Francisco Blanco, tuvo ayeri en Londres na presentación nel Reinu Xuníu de la ruta qu'Iberia Express echó a andar el domingu. L’actu cuntó cola participación del presidente de la compañía, Fernando Candela, y el direutor xeneral de Comerciu y Turismu, Julio González Zapico. Tamién asistieron trés empresarios asturianos, qu’acompañaron a la delegación institucional a la capital inglesa.

Blanco destacó que’l mercáu británicu ye bien importante p'Asturies, tanto en términos turísticos, desque Reinu Uníu ye’l tercer destín internacional que más visitantes apurre al país, como en rellaciones comerciales, porque ocupa l’octavu puestu tocante a les nueses esportaciones. Por esta razón, la conseyería reforzó les conexones con Londres, que van figurar nel contratu nuevu de promoción turística que va sacar a concursu nes selmanes vinientes y que va tener probablemente una vixencia de dos años prorrogables a otros dos, iniciativa que tamién va potenciar les conexones con París y otros aeropuertos d’Europa.

D'igual forma, el conseyeru aprovechó la so estancia en Londres pa presentar énte mediu centenar de touroperadores y medios de comunicación británicos la potencialidá turística del país. El Gobiernu tien previsto entamar unes xornaes comerciales empobinaes a operadores británicos, va amosar a periodistes del Reinu Xuníu el Camín de Santiago y va recibir seis visites d’axencies de naturaleza, ciclismu, gastronomía, ecoturismu y turismu rural.