Asturies asume competencies nueves

La Conseyería de Salú y Servicios Sanitarios va xestionar dende'l 1 de xineru del 2006 les competencies sanitaries que tenía hasta agora l'Institutu Social de la
Marina, según l'alcuerdu que se firmó ayeri en Madrid.


3,7 millones d'euros ye l'importe d'esta tresferncia pol que l'alministración autonómica va enxertar a 11.500 usuarios nuevos na so rede sanitaria, anque tres cuartes partes de los mesmos tienen tarxeta del serviciu sanitariu del Principáu. Xunto colos beneficiarios de l'atención que dan los centros del ISM, el Principáu va facese cargu de les Cases del Mar d'As Figueras, Avilés y Xixón, dotaes con servicios d'Atención Primario y una plantiya llaboral de 60 profesionales. Asturies ye la primer comunidá con Estatutu d'Autonomía de "via lenta" redactáu baxo les premises del artículu 143 de la Constitución Española qu'accede a esta competencia.

Xunto con esta competencia, el Principáu firmó tamién alcuerdos qu'apauten el coste del profesoráu de relixón que se trepasare nel 2001 y otru alcuerdu en materia d'ampliación de retribuciones al personal del antiguu INEM.


Estes tresferencies menores fírmense nun momentu en que sigue allancada la negociación ente Estáu y Gobiernu autonómicu pa la tresferencia de les competencies en materia de Xusticia. El conseyeru Javier Valledor diz que la ufierta que se fai de Madrid perita la financiación de la tresferencia nun 20% menos del so coste real, un desfase que nun se va almitir dende Asturies.