Asturies asegura qu'hai razones de pesu pa nun devolver les ayudes al sector naval

|

El Conseyeru de Presidencia, Guillermo Martínez, reafitó ayeri qu'esisten abondes razones de pesu tantu xurídiques como sociales pa nun devolver les ayudes recibíes pol sector naval. La CE declaró illegales estes ayudes.

Aportunó en que nun tien sentíu qu'España se vea empuesta a devolver los 2.800 millones d'euros que pide Bruseles, cuando Francia nun tuvo que faelo nos años 2006 y 2007 nuna situación económica y d'emplegu bien distintu y muncho más favorable. La decisión pondría en peligru la delicada situación d'una industria que, entá debilitada nos últimos años, da trabayu a cientos de persones n'Asturies.

Esti xueves el presidentes d'Asturies, Galicia y País Vascu van axuntar en Bruseles con Joaquín Almunia, vicepresidente de la Comisión y responsable de Competencia. Guillermo Martínez aprofió qu'Asturies “caltuvo una posición firme y contundente” dende'l primer momentu, sofitada en razones xurídiques y tamién sociales. Y recordó que'l presidente asturianu, Javier Fernández, yá treslladó la so molición tantu ante'l Ministeriu d'Industria como ante Bruseles.

Europa anunció'l pasáu 25 de xunu que va esixir al Estáu español el reintegru d'unos 2.800 millones d'euros en siendo declaráu illegal pola CE'l sistema conocíu como “tax lease”, usáu pa la concesión de les ayudes financieres a la construcción naval n'España ente 2005 y 2011. Estes ayudes suspendieron el 29 de xunu de 2011 arriendes de les denuncies presentaes per Holanda y Noruega.

Nel casu de los estelleros privaos asturianos la midida afeutaría principalmente a Estelleros Gondán, con instalaciones en Castropol y A Veiga. Sicasí, Pequeños y Medianos Estelleros Sociedá de Reconversión (Pymar), sostién que pase lo que pase'l dañu yá ta fechu, una y bones l'espediente abiertu per Bruseles yá provocó la perda de nuevos contratos por cuenta de la inseguridá xenerada.

 

Contador Estadistiques