Asturies apuesta pola gastronomía y los productos DOP y IXP p’atrayer turistes

La gastronomía nacional y los productos con DOP y IXP son unos activos que’l Gobiernu quier aprovechar p’atrayer turistes al país. Estos díes convida a profesionales de la información gastronómica pa dar a conocer les virtúes de la nuesa cocina.

Nesti viaxe participen siete profesionales de medios de comunicación dixitales, ente los que s’atopen Paco Becerro, fundador de ‘Directo al paladar’, o Maricar de la Sierra, responsable de gastronomía de ‘Expansión’, que sumen más de 800.000 siguidores nes sos plataformes de redes sociales, nes que van cuntar les sos esperiencies a lo llargo d’estos cinco díes n’Asturies, dende ayeri y hasta’l llunes. Na so organización participaron delles entidaes y empreses que sumaron recursos pa facer posible que la gastronomía asturiana y los sos productos con Indicación Xeográfica Protexida (IXP) o Denominación d’Orixe Protexida (DOP) avancen en canales nueves de comunicación pa llegar a más públicu.

Ente les entidaes promotores de la visita atópense les conseyeríes d’Emplegu, Industria y Turismu, y de Desarrollu Rural y Recursos Naturales, qu’apostaron por sumar esfuercios nesta iniciativa. Esta aición sigue les llinies del Programa de Turismu Sostenible 2020, qu’apuesta por avanzar en delles canales de comunicación coles mires d’aprovechar tanto la capacidá d’espardimientu como la de prescripción, como ye esti casu.

Nestos cinco díes los convidaos van visitar dellos centros de producción agroalimentaria, amás d’averase a delles de les propuestes de restauradores que formen parte de la marca de calidá Meses d’Asturies.