Asturies apuesta pol turismu rural en Fitur 2016

El Gobiernu d'Asturies va celebrar anguaño na Feria Internacional de Turismu Fitur 2016 el trenta aniversariu del turismu rural n'España, nel que'l Principáu tuvo un papel protagonista.

El conseyeru d'Empléu, Industria y Turismu, Francisco Blanco, presentó en rueda de prensa'l programa d'actividaes que se van desenvolver nel estand de 630 metros cuadraos y anováu dafechamente nel que se van esibir los recursos turísticos de la comunidá.

L’espaciu concibióse pa reforzar la marca d'Asturies nún de los foros comerciales más importantes del añu. “El nuestru cometíu nel certame ye vender la meyor imaxe del nuestru destín y facilitar el llabor comercial de les empreses del sector”, señaló Blanco.

La presencia del Principáu en Fitur va tener como oxetivu principal conmemorar los trenta años del turismu rural n'España. Nesta ocasión, l'elementu más emblemáticu va ser un xardín vertical de seis metros a la entrada del recintu que s'adapta pa recrear una estancia d'un agospiamientu rural.

Una vegada travesada esta zona, atópase un espaciu abiertu que facilita la circulación interna y afita l'atención nos elementos más relevantes de la ufierta turística asturiana al traviés de 40 imaxes de gran formatu que combinen mariña y monte.

Tamién destaca un gran videowall nel que se van proyectar distintos audiovisuales, ún d'ellos dedicáu al turismu rural. Una de les zones más importantes del pabellón ye l'espaciu dedicáu a alcuentros comerciales ente empreses del sector, operadores y oficines de turismu d'España nel estranxeru.

Pa esti fin, cúntase con una sala de presentaciones, trés sales pa xuntes privaes equipaes con sistema d'audiovisuales y un espaciu abiertu con diez meses pa entrevistes de trabayu.

El titular d'Empléu resaltó l'amplia representación d'axentes turísticos que va pasar pol estand: 156 xestores de destín de calter local y 284 representantes d'empreses y asociaciones turístiques que ven en Fitur ún de los sos principales recursos de promoción y comercialización.

Coles mesmes, 14 empreses asturianes van participar nel Workshop Hosted Buyers, l'alcuentru comercial con operadores internacionales que celebra la so sesta edición.

Actividaes

El Día d'Asturies en FITUR va celebrase'l 22 de xineru y va constituyir l'actu central de la programación. Sicasí, mientres les xornaes previes dedicaes a profesionales del sector van realizase 20 presentaciones.

Ente éstes destaquen la dedicada a los eventos conmemorativos de los trenta años de turismu rural y el posicionamientu d'Asturies como destín de turismu deportivu, que va cuntar cola presentación de les etapes asturianes de la Vuelta Ciclista a España 2016.

Amás, pa potenciar l'apueste del Principáu como destín pa la práctica del turismu deportivu, mientres les xornaes del sábadu y el domingu esibiráse un monoplaza de Fórmula 1 que cede pal eventu’l Muséu de Fernando Alonso.

La fin de selmana tamién se va poner en marcha una campaña de contratación d'escapaes a Asturies con descuentos especiales. Estes Ufiertes Fitur 2016 incluyen más de 50 propuestes d'empreses asturianes con descuentos esclusivos qu'algamen el 20 % y que van tar disponibles mientres tola feria.

Fitur va tener llugar dende'l 20 al 24 de xineru nel recintu ferial Juan Carlos I de Madrid. L’estand del Principáu ta allugáu nel pabellón númberu 9.