Asturies amuesa la so solidaridá con Catalunya

Los atentaos d’esti xueves en Barcelona, con 13 muertos y un centenar de firíos, y Cambrils, con una persona finada na mañana d’esti vienres y cinco mancaos, llevantaron una fola de solidaridá n’Asturies col pueblu catalán. Convocáronse minutos de silenciu per tol país, Uviéu declaró trés díes de llutu oficial y en Xixón les banderes llucen a media asta hasta'l domingu.

Alredor de les 16.50 hores, una furgoneta, siguiendo’l mesmu métodu que n’ataques terroristes recientes en Francia o Inglaterra, accedió a les siempre masificaes Rambles de Barcelona y llevóse per delantre a velocidá alta a tola xente que pudo. El resultáu foron 13 muertos y un centenar de firíos, dalgunos d’ellos graves.

L’Estáu Islámicu nun tardó en reivindicar l’atentáu. Nun mensaxe afirmó que “soldaos” del califatu cumplieron órdenes contra “países de la Coalición”.

L’autor presuntu del atropellu trátase de Moussa Oukabir, mozu de 17 años residente en Ripoll y con doble nacionalidá española y marroquina. Les fuercies de seguridá tán tres la so busca tres escapar del llugar secuestrando un vehículu qu’abandonaría más tarde tres apuñalar al so propietariu, anque esti socesu entovía tien munches incógnites.

Mentes, detuviéronse a dos persones venceyaes col atentáu: Driss Oukabir, hermanu de Moussa, y un segundu individuu n’Alcanar (Tarragona).

Cinco terroristes abatíos en Cambrils

Yá de nueche, y tamién col mesmu método, seis persones resultaron atropellaes por un vehículu ocupáu por cinco terroristes en Cambrils, finando esta mañana una d’elles. El coche volcaría darréu tres tratar d’evitar un control, momentu nel que los Mossos d'Esquadra aprovecharíen p’abater a los atacantes.

La situación provocó momentos de pánicu nesta población de la Costa Daurada, enllena de turistes pasando les sos vacaciones.

Minutos de silenciu

Asturies nun tardó n’amosar la so solidaridá con Catalunya polos ataques d’ayeri. Les redes sociales, nun primer momentu, enllenáronse de mensaxes contra’l terror y de sofitu a les víctimes y tol pueblu catalán.

Yá güei, celebráronse minutos de silenciu en tol país. Asina, hebo concentraciones na Xunta Xeneral, na Plaza Mayor de Xixón, Uviéu –tamién na Plaza de la Catedral– y Avilés, na Feria Internacional de Muestres d’Asturies (FIDMA) y nel Hospital Universitariu Central d’Asturies (HUCA) y l’Álvarez Buylla, ente otros munchos llugares.

Uviéu declaró trés díes de llutu y suspendió tolos eventos y actividaes culturales previstes, mentes que Xixón anunció que toles banderes van tar a media asta tamién hasta’l domingu.

Semeya propiedá del Conceyu de Xixón.