Asturies amuesa la so indignación pola mengua de la inversión nos Presupuestos Xenerales del Estáu

La rebaxa nun 31,6 por cientu de la inversión estatal n’Asturies nun foi bien recibida nel país, cola esceición única del PP. Andecha afirma que’l Gobiernu estatal castiga a los asturianos y el presidente Javier Fernández fala de “discriminación”.

Les cifes de los Presupuestos Xenerales del Estáu pal 2014 dexen malparada a Asturies al recibir un total de 291 millones, un 31,6 por cientu menos que nel 2013. D’esta forma, el país ye’l territoriu onde más baxa la inversión, siguíu de Murcia, con un 27 por cientu, siendo la mengua media estatal del 7 por cientu. Estes perres van destinase, de manera principal, pa la variante de Payares (189,79 millones), un dineru que se considera insuficiente pa ver avances reales nesta obra, y pa l’autovía del Cantábricu (75,1 millones pal Unquera-Pendueles y 24 pal Otur-Viḷḷapedre).

Les cantidaes que recibirá Asturies son, p’Andecha Astur, un castigu del Gobiernu estatal. “Les cifres falen por sigo mesmes, y una vuelta más dende Andecha Astur tornamos a denunciar la política d’aniquilación a la que mos somete l’Estáu español, hipotecando’l nuesu presente y fundiendo’l nuesu futuru; y el patetismu y la incapacidá del ‘Principado’, tantu comu istitución impuesta dende Madrid comu en cuantes a los políticos ellí representaos, que nun pasen de ser xestores alministrativos d’un Gobiernu sucursal, valeru de conteníos y de voluntá política”, señalen dende la formación nacionalista, que considera “qu’un Gobiernu que pretenda representar a los asturianos nun pue permanecer infinitamente calláu y servil énte les contines agresiones del Estáu español”, acusando al Executivu del Javier Fernández de ser a la fin “un cómpliz necesariu de les polítiques de destruición del texíu económicu y social asturianu”.

El PP defende les cuentes

Toles formaciones, a esceición del Partido Popular (PP), criticaron la posición na que queda Asturies nos Presupuestos Xenerales. El presidente del país afirmó que son “los presupuestos de la discriminación a Asturies” y cargó contra’l ministru de Facienda y Alministraciones Públiques, Cristóbal Montoro, poles sos declaraciones pa defender les cuentes no que respeuta al nuesu país: “el debate nun ye la cuantía, sinón medrar y crear emplegu”, señaló’l popular. Pela so parte, la presidenta del PP asturianu, Mercedes Fernández, afirmó qu’Asturies “sal bien parada” nos Presupuestos al ser la tercera comunidá autónoma n’inversión per habitante.