Asturies presenta una alineación de luxu pal Interceltique d’An Oriant

|

Tejedor, Cerezal y Alienda van actuar na villa bretona nel marcu d’un festival qu’esti añu va tar dedicáu a Kernow y Mannin.

El XLV Festival Interceltique de Lorient va celebrase del 7 al 16 d’agostu y, como ye vezu, Asturies va presentar una delegación d’una calidá enorme. Los representantes asturianos na Grande Parade des Nations Celtes del domingu 9 van ser la Banda Gaitas El Trasno (Cuaña) y la Banda Gaites LaKadarma (Nava), xunto cola Asociación de Baile y Danza Tradicional Filandón (Uviéu). Les trés formaciones tamién van protagonizar actuaciones el restu la semana, siendo les más importantes les 'Nueches Intercéltiques' nel campu de fútbol del Lorient y les que tienen como sede l’Espace Marine, toes a les 14.30 hores: El Trasno, el martes; LaKadarma el miércoles; y Filandón, el vienres 14.

No que respeuta a bandes folk, la representación asturiana ta formada por Tejedor (domingu nel Grand Théâtre xunto colos escoceses Breabach), Cerezal (xueves nel Palais des Congrès xunto colos irlandeses The Friel Sisters) y Alienda, que va participar nel Trophée Loïc Raison. Amás, tamién va actuar el grupu astur-bretón Amieva, formáu por el violinista Yann Le Nay, el batería Erwan Ganier, la cantante Clara Diez-Marquez y l’acordionista Fañch Loric (sábadu 8 na Quai de la Bretagne xunto coles bandes llocales Kerdebig, Majan y Robic-Guillarme).

Trixésimu aniversariu del Mac Crimmon

Tamién el sábadu va celebrase’l tradicional Mac Crimmon, que vive la so trixésima edición. Nesta ocasión, Asturies va tar representada por Álvaro Álvarez Fernández, ganador del añu pasáu, Daniel Meré, Fabián Fernández Fernández y Fernando Vázquez. Enantes, el primer vencedor del antiguu Macallan, Xuacu Amieva, va protagonizar una clase maxistral del gaita xunto col gallegu Edelmiro Fernández.

Yá de martes, el d’El Mazucu va participar xunto con José Manuel Tejedor na ‘Gran Nueche de la Gaita’ prevista nel Palais des Congrès pa les 21.30 hores, cita na que tamién tán confirmaos los gaiteros Alberto Coya y Edelmiro Fernández (Galicia), Fred Morrison (Alba) y Patrick Molard (Breizh).

L’hermanu de José Manuel, Javier Tejedor, va protagonizar pela so parte una clase maxistral d’acordión xunto cola irlandesa Sharon Shannon el vienres 14. Una esposición d’Helena Toraño y la proyeición del llargometraxe en llingua asturiana ‘Bernabé’ completen la presencia asturiana nel festival celta más importante del mundu.

Contador Estadistiques