Asturies algama la 'normalidá nueva'

La incidencia acumulada a 14 díes ye menor de 25 dende'l sábadu y sigue baxando.

Ocho díes depués d'entrar en nivel d'alerta baxa, Asturies pasa a tar en 'normalidá nueva'. La cayida de casos n'Asturies ye constante y l'actualización última de los datos –güei la Conseyería de Salú al ser festivu n'Uviéu nun dio los nuevos–, colos correspondientes a la fin de selmana, confirmó esti avance que yá s'esperaba.

El xueves había 27,39 casos cada 100.000 habitantes, que'l vienres baxó a 25,32 y, finalmente, el sábadu a 23,75, yá perbaxo de la barrera de 25 que marca la llende de 'normalidá nueva'. El domingu la incidencia acumulada yera de 21,89.

Asturies ye la única autonomía nesti nivel, col restu perriba de los 58,43, cifra que rexistra la Comunitat Valenciana. La media estatal ta en 83,43.

Na imaxe, gráficu del Observatoriu de Salú n'Asturies con rexistros dende'l 20 d'agostu del 2020 hasta'l domingu.