Asturies afita'l so compromisu na llucha contra'l dopaxe

|

La Direición Xeneral de Deportes va roblar un conveniu cola Axencia Española de Proteición de la Salú nel Deporte (AEPSAD).

El Gobiernu dio'l preste a esta iniciativa contra'l dopaxe nel deporte, que se va materializar el día 19 cola firma de dichu conveniu ente José Ramón Tuero y el presidente d'AEPSAD, Enrique Gómez Bastida, nel marcu d'unes xornaes sobre la llucha contra'l dopaxe nel deporte que van tener llugar n'Uviéu (martes 19) y Xixón (miércole 20). La so finalidá ye establecer futures fórmules de cooperación destinaes a executar programes de sofitu a la proteición de la salú nel ámbitu del deporte, mesmo que la de facilitar un conxuntu de preseos didáuticos pa empobinar y formar a los deportistes.

L'alcuerdu compromete a dambes entidaes a definir los medios materiales y personales necesarios pa contribuyir a una práutica deportiva más saludable y segura, amás d'entamar una collaboración na promoción de la investigación científica y téunica en materia de proteición de la salú de los deportistes y la llucha contra'l dopaxe. D'igual forma, promueve la promoción de compromisos éticos pa un deporte llimpiu per parte de deportistes, entrenadores y téunicos.

Actividaes pa estudiantes y maestros

L'alcuerdu preve tamién la organización de xornaes, seminarios y xuntes conxuntes empobinaes a deportistes, téunicos, médicos deportivos y personal de sofitu, pa informar sobre los procedimientos que se lleven a cabu na AEPSAD pa la prevención de la salú, el control del dopaxe, y los riesgos de les sustancies y los métodos prohibíos. El propósitu ye llevar estes actividaes a centros d'enseñanza y universidaes, y dirixiles a estudiantes y maestros.

El conveniu contempla la ellaboración conxunta de protocolos de detección y comunicación de práutiques ilícites na llucha contra'l dopaxe, que, xunto al xuegu llimpiu, son l'oxetu final de la collaboración ente la Direición Xeneral de Deportes y AEPSAD en tolos ámbitos nos que puedan tener competencies y per tolos medios que tán a la so disposición. En pallabres del Tuero, l'alcuerdu “nun supón sinón la renovación del que suscribimos nel 2011. De magar, camudaron munches coses nel ámbitu de la llucha contra'l dopaxe. Como siempre, el nuestru oxetivu ye mentalizar a los deportistes, y a los que prautiquen actividaes físiques n'Asturies, de qu'hai que garantizar el deporte llimpiu”.

 

 

 

Contador Estadistiques