Asturies celebra actividaes per tol país de manera paralela a los actos institucionales de la XXXVI Selmana de les Lletres Asturianes

Esposiciones, presentaciones de llibros, eventos de calter musical y artísticu… Son munches les actividaes venceyaes a la llingua asturiana que se celebren nel país estos díes de manera paralela a les institucionales de la XXXVI Selmana de les Lletres Asturianes.

Esti llunes inaugúrase na Casona del Bravial de Blimea la esposición ‘Vtp, venti añu faciendo llibros’, qu’entama la Conceyalía de Cultura de Samartín del Rei Aurelio al traviés de la so Oficina de Normalización Llingüística. Nella’l visitante va poder conocer el llabor de la editorial xixonesa dirixida dende’l so entamu por Concha Prieto y Milio Rodríguez Cueto, con un catálogu ampliu de llibros nel nuesu idioma destinaos a tolos públicos. “La muestra quier ser un homenaxe a tol trabayu d’estos años, y nella ufiértase una esbilla de los sos llibros, autores y xéneros más destacaos”, espliquen dende’l SNL dirixíu por Hugo Cortina sobre esta esposición que pue visitase hasta’l 22 de mayu n’horariu de 9 a 13 hores, de llunes a vienres.

De forma complementaria, Vtp tamién va facer dos presentaciones de llibros nesti conceyu del valle del Nalón. Asina, el miércoles María Luz Pontón va dar a conocer los detalles de la so obra ‘Pa la cama’ a un grupu d’escolinos del Colexu Públicu Rei Aurelio de Sotrondio. Mentes, el 19 de mayu, Rodríguez Cueto va facer lo propio con ‘L’últimu volador’, anque esti actu va tar abiertu a toles persones interesaes.

Otra esposición que se pue disfrutar n’Asturies esta selmana ye la qu’organiza’l Serviciu de Normalización Llingüística de la Mancomunidá de la Sidra en Nava, de nome ‘La llingua na historia’. Ésta percuerre al traviés de paneles esplicativos y ilustraciones, la historia de la llingua asturiana dende los primeros documentos medievales hasta l'actualidá, con especial atención a los testos y escritores asturianos del ámbitu xeográficu de la zona. L’amuesa va tar abierta al públicu na Casa Cultura hasta’l sábadu y compleméntase con un recital de poesía de Pablo Texón previstu pa mañana a les 19 hores nel que’l de Felechosa va centrase nes sos creaciones correspondientes a ‘La culpa y la lluz’, obra merecedora del Premiu Teodoro Cuesta de poesía del añu 2006.

Xixón, Les Vegues y A Veiga

En Xixón desendólquense les XX Xornaes de Llingua y Cultura Asturiana, entamaes pol Atenéu de La Calzada y diez centros escolares del oeste del conceyu, que tuvieron como primer actu un homenaxe a Pachín de Melás nel parque d'El Cerilleru. Esta tarde, a les 19.30 hores, va continuar cola participación de l’Asociación de Intérpretes de la Canción Asturiana (AICA) dientro del ciclu ‘L’asturianada nos centros municipales’, pa siguir mañana cola presentación a la mesma hora del llibru ‘Cápsules de tiempu’, de Carlos González Espina, obra cola que ganó’l VII Premiu María Xosefa Canellada de lliteratura infantil y xuvenil. Esti eventu tamién forma parte de les actividaes oficiales de la XXXVI Selmana de les Lletres Asturianes.

El miércoles, a les 18 hores, Carlos Alba ‘Cellero’ va representar ‘Xuan Soldáu’, mentes que’l xueves 14, a les 19 hores, va tener llugar una actuación del grupu Mestura colos sos ‘Poemes de carambelu’. Marisa López Diz y Luis Manuel Suárez van repetir el miércoles 20, a les 19.30 hores, con cantares en gallego-asturiano tres la proyeición del curtiumetraxe ‘A fiya del xastre’, realizáu pola cantante del dúu. Xunto a estes actividaes abiertes a tol públicu, los escolinos van poder disfrutar de talleres d’alfarería, d’introducción al monte, d’iniciación al cómic o a los bolos, amás de corales infantiles y actuaciones teatrales. Los rapacinos y rapacines de terceru d’Infantil, mentes, van participar nun taller de xuegos tradicionales asturianos.

Un recital de poesía de nome ‘Versos contra’l silenciu’ ta programáu pal miércoles na Centru Sociocultural de Les Vegues, en Corvera. Ésti va principiar a les 18 hores, con entrada llibre, y va contar cola participación d’Ánxel Álvarez Llano, Xuan Carlos Crespos Lanchas, Berto García, Esther García, José Ángel Gayol, Marta Mori, Miguel Rodríguez Monteavaro, Susana Sela y Pablo X. Suárez.

Nel occidente del país, en concreto n’A Veiga, va celebrase esti xueves la presentación de la novela en gallego-asturiano ‘El Batallón Galicia’, de Cristóbal Ruitiña. Nel actu, convocáu pa les 20 hores na Casa Cultura, el periodista va tar acompañáu pol activista cultural Ángel Prieto Souto.

Actividaes artístiques

A pesar de nun tener un calter llingüísticu, ye pa destacar la celebración en La Pola Ḷḷena del XI Alcuentru con Nel Amaro, con presencia de quince artistes d’Irlanda del Norte, México, Rusia, Inglaterra, Catalunya, Madrid y Asturies. Esta iniciativa del Atenéu Nel Amaro, que principia güei y fina’l día 16, tien previsto esposiciones, amueses d’arte d’aición y performances, talleres y presentenciones, amás d’una residencia d’una selmana nel Albergue de Columbieḷḷo, y naz pa recuperar los alcuentros de perfomances que l’artista fináu nel 2011 y Abel Loureda entamaran nesti conceyu del valle del Caudal nos años 90.