Asturianos nos EEXX

A primeros del sieglu XX, nel añu 1910, los trabayadores de la fábrica de Zinc d'Arnao, en conceyu Castrillón, cansos de les males condiciones de trabayu y les pagues de miseria, entamaron una fuelga de les grandes qu'acabó col
trunfu de la empresa y el despidu d'un grupu grande de trabayadores . Ensin
trabayu nin manera d'alcontrar daqué curioso, decidieron pasar el charcu
y embarcaron p'América, onde alcontraron colocación na industria
del zinc de los Estaos Xuníos. Prendió asina'l guañu d'una riestra de
comunidaes asturianes pequeñes y esgayaes en garapiellos de xente que quedaron espardíos per tola xeografía de los EEXX, incluyendo los estaos d'Indiana, Kansas, Missouri, New York, Ohio, Pennsylvania, o Virginia.

Anguaño, dellos d'estos grupos entovía guarden concencia de los sos anicios astures, como ye'l casu d'una pequña comunidá del estáu de West Virginia que ñació alredor de la industria del Zinc del Condáu de Harrison Va dellos meses estrenó una páxina web dende la que pretende dir arreyando a tola emigración asturiana nos EEXX. AsturianUS.org (Asturianos nos US) ye la dirección d'esta web iniciativa de Bob Martinez y Art Zoller Wagner na que tamién collabora Suronda Martínez, quien ta acabante d'espublizar xunta l'historiador Gavin González na editorial de la Universidá de West Virginia'l primer llibru sobre la emigración asturiana nos EEXX, entituláu Pinnick Kinnick Hill.

Orgullosos de la tradición cultural y la llingua asturianes, como pue vese nes opiniones que manifiesten nos sos tableros d'opiniónlos "asturian-american" como diría la nomenclatua oficial yanqui, dannos tamién otra visión sobre l'emigrante asturianu estremada de la de los tópicos del indianu ricu o del indianu probe, y ye qu'un nun pue evitar la sorpresa de ver una placa conmemorativa de veteranos na Segunda Guerra Mundial onde bien de lo apellíos son asturianos