Asturiana Mining Company, Skinny Lister y Liam Ó Maonlaí, nel II Festival Arcu Atlánticu de Xixón

Yá se conocen les actuaciones musicales que van tener llugar na Plaza Mayor de Xixón mientres el II Festival Arcu Atlánticu. Asturiana Mining Company, Skinny Lister y Liam Ó Maonlaí son dalgunes de les formaciones confirmaes.

El festival impulsáu por Carlos Rubiera, conceyal d’Educación, Cultura, Xuventú y Fiestes va tener llugar nesta segunda edición de 26 xunetu al 4 d’agostu, polo qu’amplía la so duración hasta los 10 díes, y va tar dedicáu a la ciudá de Naunnt/Nantes, perteneciente al territoriu de la Bretaña histórica. Música, amueses de cocina, lliteratura y actividaes marines van tornar a conformar esti cóctel dedicáu a la cultura atlántica cola que Xixón pretende tornar a mirar al norte.

Pese a que tovía nun se presentó de manera oficial el certame, yá se conocen les actividaes que se van desendolcar nel escenariu principal, asitiáu na Plaza Mayor, siempre a les 21.30 hores. El sábadu va abrir el ciclu de conciertos Jane Joyd, nomatu utilizáu pola coruñesa Elba Fernández pal so proyeutu musical, carauterizáu por unes composiciones sensibles n’inglés que beben del folk de raigañu americanu. Al día siguiente, va ser el turnu de los franceses de Les Tambours du Bronx, que tornen a la ciudá 14 años depués cola so puesta n’escena espectacular y el so soníu fechu con bidones.

Tres l’ésitu de la esperiencia del añu pasáu, el llunes y el martes dellos cocineros, tovía por confirmar, van protagonizar una amuesa de cocina, pa tornar cola música na Plaza Mayor el miércoles cola Asturiana Mining Company, banda formada por Michael Lee Wolfe nel añu 1998. Depués d’un descansu’l xueves, el vienres y el sábadu va haber dos actuaciones nueves. En primer llugar van xubir al escenariu Skinny Lister, banda inglesa qu’amiesta cantares llentos con otros baillables al más puru estilu ‘The Pogues’, pa dexar pasu’l día siguiente a Liam Ó Maonlaí, maestru pianista que tamién toca la guitarra, l’arpa, el whistle y el bodhram. El músicu irlandés ye bien conocíu por ser miembru de Hothouse Flowers y por collaborar con artistes como Carlos Núñez, Donal Luney, U2, Rolf Harris o Van Morrison, ente otros.

La clausura del II Festival Arcu Atlánticu, pela so parte, va celebrase’l domingu al meudía nesi mesmu escenariu y va contar cola participación de la Banda de Gaites Noega y la Banda Gaites Villa de Xixón, xunto con otres formaciones por confirmar.

Na semeya, l'Asturiana Mining Company el martes pasáu mientres la so actuación na inauguración de la esposición '25 años de conciertu en cartelos' entamada pola Xunta pola Defensa de la Llingua Asturiana na Plaza'l Pescao d'Uviéu.