Asturgold lleva la Bullada Purpurina de la Coordinadora Ecoloxista

|

Esti 28 d’avientu, Día de los Santos Inocentes, la Coordinadora Ecoloxista d’Asturies falló, como ye vezu, la Bullada Purpurina. Nel 2012 esti gallardón negativu viaxó a Tapia, en concreto a la empresa minera Asturgold.

La firma que pretende impulsar una mina d’oru en Salave fixo más méritos que los otros candidatos principales –la conseyera d’Agroganadería y Recursos Autóctonos, María Jesús Álvarez González; Hidrocantábrico; Victorino Alonso; y Coxersa– pa llevar la vixésima edición de la Bullada Purpurina, gallardón “que reconoz el llabor y aiciones d’empreses, instituciones y alministraciones que más destacaren nel so trabayu en contra de la conservación de la naturaleza y el mediu ambiente asturianu”, espliquen dende’l coleutivu ecoloxista. “Destaca la triunfadora nel arte de desplegar espertos y escuros manexos p’algamar la concesión alministrativa que-y permite esplotar los nuesos recursos na mina d’oru de Salave y, valiéndose de la coxuntura del paru qu’afara l’occidente, vendió a los desemplegaos miles de puestos de trabayu, alzándose como salvación económica cuando sabe que será la fonte de toles decepciones”, afirmen en referencia a Asturgold.

N’opinión de la Coordinadora, la empresa minera “llegó a Asturies y, utilizando la so falta de escrúpulos, compró y manipuló a los corruptos, entrando al enfrentamientu direutu colos vecinos que s’oponen a los sos proyeutos especulativos”. Coles mesmes, premien a Asturgold “pol méritu que supón el desendolque del so talentu magníficu pa la modificación del proyeutu inicial que finalmente coló a l’Alministración, a la que bien conoz pola so carauterística desdexación de funciones inspeutoras – porque asina asocede con otres munches actividaes estractives a les que nun se-yos aplica control alministrativo dalgún–”, pa darréu añadir que “anque’l Principáu redoblara los sos esfuercios na so vixilancia, Asturgold yá dio muestres de nun omitir nada pa burllala”.

Dende’l coleutivu ecoloxista esperen qu’esti gallardón sirva pa despertar “a les diferentes alministraciones que permiten qu’avance esti proyeutu mineru disparatáu con un impautu que pue ser una hipoteca pa los conceyos de Tapia, El Franco y Castropol”. “Nós nun somos ciudadanos aporfiaos, nin obedecemos los decretos de la cobicia que despierta l’oru, y, yá sía a cielu abiertu o so tierra, siguiremos de cerca los movimientos de la gallardonada hasta que salga del conxuru’l Principáu y aborde ensin más rodeos la defensa del nuesu patrimonio natural, yá que nun hai mou d’antroxar los fechos y los asturianos obligaremos-y a esi cambiu de xestión tan necesariu”, asegura la Coordinadora Ecoloxista d’Asturies.

 

Contador Estadistiques