Ástura fala del acebache con María Pérez

|
Ástura fala del acebache con María Pérez

La presidenta de l'Asociación Azabache Jurásico de Villaviciosa va poner la charra 'L'acebache astur: l'agonía d'un legáu'.

Ástura quier dar voz al gremiu de profesionales del acebache énte les dificultaes de tou orde qu'atopen dende va años, como la venta de materiales de menor calidá vendíos como talo, polo que conviden a María Pérez na so conferencia mensual nel Atenéu Obreru de Xixón sobre cultura asturiana. "Pa ser conscientes del valor d'esta ayalga na so xusta midida ye necesario saber cómo se formó. Les carauterístiques tan estraordinaries del acebache asturiano débense a la so formación en condiciones desaxeradamente peculiares. Estes diferencies, bien significatives ya importantes frente a materiales d'aspeutu asemeyáu, faen del acebache asturiano un mineral únicu", apunten dende l'asociación cultural.

Pérez va falar de "la rellumanza y la decadencia d'un material apreciáu a lo primero poles sos connotaciones máxiques, dempués demandáu por tradición y, pa cabu, escurecíu tantu pol desdexamientu alministrativu como poles práutiques d'un sector tomáu por sucedáneos foriatos baratos de calidá mui deficiente". N'opinión d'Ástura, "la recuperación del acebache asturiano xenuín solo s’algamará marcando la diferencia y demostrando qu'esa ye la manera de facer xorrecer el so apreciu y valía", dalgo que ta en manes les alministraciones que "quieran ver el potencial económicu, turísticu y cultural del acebache asturiano y sofitalo".

La charra mensual d'Ástura va tener llugar mañana a les 19.30 hores na segunda planta de la Escuela de Comerciu Antigua, llar nuevu del Atenéu Obreru de Xixón. La entrada pa siguir la conferencia de Pérez, xoyera y maestra acebachera con 25 años d'oficiu que trabaya na recuperación y el reconocimientu públicu y social de la nuesa cultura acebachera, ye llibre.

Na semeya, una pieza d'acebache obra de Pérez.

Contador Estadistiques