Ástura dedica la so conferencia mensual a la historia de la esploración de Cueva Güerta

|
Alberto Espina

L'espeleólogu Alberto Espina ye'l convidáu na cita de payares nel Atenéu Obreru de Xixón.

Deporte y ciencia axúntase na charra mensual sobre cultura asturiana qu'entama Ástura tolos meses na sede de la entidá na Escuela de Comerciu Antigua, habitualmente'l tercer martes de cada mes, que nesta ocasión treslladóse al cuartu por motivos d'axenda. Asina, mañana, a les 19.30 hores, el miembru del Grupo de Espeleología Diañu Burlón y del Grupu d'Espeleosocorru Asturianu va protagonizar la intervención 'Cueva Güerta. Historia d'una esploración'.

"Nesta conferencia vamos descubrir el mundo soterrañu del Monumentu Natural de Cueva Güerta al traviés del trabayu fechu por delles xeneraciones espeleólogos. Adientrarémonos nes sos galeríes y sales maraviyoses al empar que diremos viendo las distintes téuniques utilizaes pa la so esploración a lo llargo de toos estos años", apunten dende Ástura. Cueva Güerta ye la cavidá natural más grande d'Asturies, con 23 quilómetros esploraos, y ta en Fresnéu (Teberga).

Espina, xixonés del 1973 que forma parte de los equipos d'esploración, topografía y fotografía de Cueva Güerta, va esplicar el llabor d'esploración, planimetría y cartografia impulsáu pol Colectivo Asturiano de Espeleólogos (CADE) y la Federación d’Espeleoloxía del Principáu d’Asturies (FESPA). La entrada pa la conferencia ye llibre.

Contador Estadistiques