Ástura dedica la so charra mensual a esplicar '¿Por qué ye necesaria la oficialidá del asturianu?'

|
Inaciu Galán

Va encargase de ponela Inaciu Galán. Tamién va proyeutase'l documental ‘La vida ensin oficialidá: les consecuencies de la falta de drechos llingüísticos n’Asturies’.

Baxo'l nome de '¿Por qué ye necesaria la oficialidá del asturianu?', el periodista y presidente d'Iniciativa pol Asturianu va esplicar "qu’esti reconocimientu ye la ferramienta llegal pa igualar los drechos llingüísticos de los y les asturianes, en cumplimientu del mandáu constitucional. Amás va ser una manera que mos va sirvir pa mantener vivu el patrimoniu llingüísticu d’Asturies. Y tamién porque va xenerar riqueza dinamizando la industria y la economía como asocede n'otros territorios del Estáu", apunten dende Ástura.

L'asociación cultural, que nagua por que "esti seya l'añu de la oficialidá", recuerda que "los defensores de les llingues asturianes y la so oficialidá, que somos la mayoría de la sociedá, queremos que los nuesos drechos tean reconocíos nun estatus d’igualdá colos falantes de castellán. Los asturfalantes nun vamos contra nadie. Cenciellamente llevamos 40 años esixendo pacíficamente’l cumplimientu n’Asturies del artículu terceru de la Constitución, que nos reconoz unos drechos hasta agora negaos por una clase política que presume de democrática. Nesta defensa de los drechos llingüísticos cada día tenemos más sofitos, y vamos xenerando un mayor consensu social que va medrando al rodiu del nuesu patrimoniu llingüísticu".

La charra y la proyeición del documental fechu a costafecha por Iniciativa pol Asturianu y Cuatro Gotes Producciones pal Seminariu ‘Oficialidá, el camín constitucional pal futuru del asturianu’ entamáu nel Edificiu Históricu de la Universidá d’Uviéu en marzu va tener llugar mañana a les 19.30 hores nel llar del Atenéu Obreru de Xixón (segunda planta de la Escuela de Comerciu Antigua). La entrada pa les conferencies d'Ástura sobe cultura asturiana, qu'entama tolos tercer martes de cada mes, ye llibre.

 

Contador Estadistiques