Asoleyaes les candidatures presentaes a les elecciones del 27 de mayu

El Boletín Oficial del Principáu d'Asturies presenta dende ayeri pela tarde'l llistáu de candidatures presentaes a les elecciones a conceyos y Xunta Xeneral del Principáu d'Asturies del próximu 27 de mayu. Amás de les 1a llistes que van competir por diputaos na Xunta Xeneral, el llistáu espeya como namás trés formaciones, PSOE, PP y IX-BA-Verdes presenten llistes a tolos 78 conceyos del país, mientres que la coalición PAS-URAS va ser la cuarta fuerza que se presente a más conceyos, con un total de 35 aspirantes a acaldes. La Coalición "Unidá", qu'axunta a IAS, Andecha Astur y Los Verdes- Grupu Verde, presenta llistes por un total de 15 conceyos, mientres que baxo'l nome d'Andecha Astur en solitario hai presentaes 12 llistes.

Esti llistáu nun ye definitivu y ta sometíu a igua d'errores y incorrecciones hasta que s'asoleye la llista definitiva de candidatures proclamaes el próximu 1 de mayu, y, de fechu, les primeres irregularidaes yá entamaron enantes de dase anuncia de les candidatures cuando la Xunta Electoral detectó la presencia del nome d'Andecha Astur en dos llistes distintes. Ayeri, la formación Izquierda Xunida denunció l'ausencia na publicacaión del BOPA de les sos llistes por Caravia y Colunga xunto con un un error na de El Franco. D'otra manera, la Xunta Electoral de Llaviana conseñó que los candidatos del númberu 2 al 7 de la llista por Casu de la Coalición PAS-URAS nun firmaren la declaración espresa de nun tar incursos en causa llegal que los separtare del procesu electoral.