Asoléyase “La vaca Roxa” una novela inédita de Dolores Medio

La Conseyería de Cultura d'Asturies y la Fundación Dolores Medio, en collaboración col diariu La Voz de Asturias editaron la novela "La vaca roxa" rellatu inacabáu y inéditu de la escritora asturiana Dolores Medio, ganadora del Premiu Nadal nel añu 1953 cola so obra más conocida "Nosotros, los Rivero".

L'estudiosu Victor Alperi foi quien alcontró les 100 fueyes que Dolores Medio llegó a escribir enantes de morrer d'esta obra ambientada n'Asturies rural y que tuvo nun tris de nun reconocese en cuantes que pal testu orixinal la escritora emplegaba fueyes que yá taben escrites pela otra cara. De lo qu'hai escrito de "La vaca Roxa" sal un rellatu curtiu que ta acabante d'editase en forma de llibru, pero nun se descarta que la escritora-y quixere dar continuidá a la narración, que bien pudiere tenese convertío na otra gran novela del campu asturianu nel sieglu XX xunto con "L'Aldea Perdida" d'Armando Palacio Valdés. La trama, ambientada n'Asturies rural, afonda amás nos problemes de la vida diaria d'esti mediu agrícola y ganaderu, faciendo nel so día la escritora un importante llabor de documentación.