Arranquen trés díes d’estudiu de la llingua y cultura del país

Esti martes arrancaron les Xornaes Internacionales d’Estudiu qu’organiza l’Academia de la Llingua Asturiana. Na so XXIX edición, les xornaes van facese hasta’l y xueves 4 de payares y van cuntar con un homenaxe a Xosé Lluis García Arias.

 
La Facultá de Filosofía y Lletres de la Universidá d’Uviéu ye’l llugar nel que se van acoyer estes XXIX Xornaes Internacionales d’Estudiu qu’arranquen el martes 2 de payares a les 16.30. Esi día van tratase temes como los personaxes femeninos nel teatru asturianu, la poesía del Surdimientu, los cuentos tradicionales asturianos, la etnomedicina tradicional o l’análisis del asturianu nel periódicu El Eco de Avilés.
 
El miércoles 3, tamién dende les 16.30, va falase de les terminaciones asturianes en -uga y -úa, toponimia, l’asturianu na dómina dixital y la biblioteca virtual María Xosefa Canellada. Tamién va haber espaciu pa la traducción nel sistema lliterariu asturianu y pal usu de la llingua asturiana na terminoloxía matemática.

Homenaxe a Arias
El xueves 4, como últimu día, va zarrar con un homenaxe al profesor y expresidente de l’Academia de la Llingua Asturiana, Xose Lluis García Arias. Amás d’esto, llingüístes internacionales van falar d’otros temes filolóxicos y culturales.