Arranca'l VIII Festival Intercélticu d'Avilés y Comarca

La octava edición del Festival Intercéltico de Avilés y Comarca arranca güei vienres con un Concurso d'Echadores de sidra na plaza Carlos Lobo (17.30 h) y con la apertura de muestres etnográfiques en Palaciu Valdecarzana (18.00 h). A esa mesma hora, na Plaza d'España, va entamar, en collaboración col "Club La Peonza" una eshibición de xuegos tradicionales, mientres que pa sobre les siete la organización convida a una espicha popular na Plaza Carlos Lobo con actuación del Cuartetu Torner.

Ún de los puntos fuertes de la xornada va ser la "Caetra Céltica", en cuatro puntos distintos de la ciudad dende les 20.30 h cola banda escocesa City of Edimbourgh Pipe Band en Les Meanes, la formación irlandesa Nolan School of Irish Dance en Carbayéu, los galesos Danswyr Gwerin Pen-Y-Fai en Riveru y los bretones Kerlenn Pondi na plaza'l Carbayu de Sabugu, siendo a les 20.45 h na plaza Carlos Lobo la presentación de bandes y grupos participantes en
festival.

Sicasí, el ganchu de la xornada va ser la celebración de la primer "Nueche Guinness" na plaza de "Carlos Lobo" colos grupos D.R.D. y Leilía. Les sigles de los primeros son conocíes de vieyo de los llectores d'Asturies.com, y tres d'elles tan los nomes de Diego Pangua, Rubén Bada y Dolfo Rodríguez, trés grandes virtuosos instrumentistes. Otru apueste distintu ye'l del grupu gallegu Leilía, formación de cinco moces de Santiago que toquen acompañaes de panderetes y que-y dan más puxu a la cuestión vocal qu'a la instrumental. La crítica gallego comparóles dacuando con Berrogüeto, anque lo meyor ye echar una güeyada a la so web y descargar dalgún cantar de los que tienen ellí puestos.