Arranca’l XIX Festival Intercélticu d’Avilés

La participación d’una banda de gaites neozelandesa, principal novedá d’un certame que va allargase hasta’l domingu.

L’Auckland & District Pipe Band fai qu’esti país antípoda del nuesu participe per primer vegada nel Festival Intercélticu d’Avilés y Comarca, entamáu pola Asociación Cultural Esbardu, que tamién va contar con representantes d’Alba (Isle of Cumbrae Pipe Band), Breizh (Camille Levecque), Galicia (Pelepau) y Lleón (Danzantes de Pobladura de Pelayo García), amás d’una importante representación asturiana. Tamién destaca la presencia de la Mosquera Celtic Band, con miembros gallegos y castellanos, que va presentar el vienres un espectáculu de más de dos hores de llargor con baillarines irlandeses y delles collaboraciones.

La plaza d’El Carbayéu va ser la sede de les actuaciones principales, siempre a les 22.30 hores, que se van aniciar esta nueche con canción asturiana. Mañana va protagonizar la xornada Rubén Alba y la Isle of Cumbrae Pipe Band, mentes que’l xueves ta prevista una Nueche Celta con La Bandina Tuercipié. El vienres va ser el turnu de la Mosquera Celtic Band, mentes que’l sábadu va celebrase la Lluna Celta cola participación de Xuacu Amieva, Fernando Mosquera, los Danzantes de Pobladura de Pelayo García, Camille Levecque y les bandes de gaites neozelandesa y escocesa, ente otros artistes.

Nestos seis díes, tola ciudá va respirar ambiente celta con espaciu, amás de pa la música, pa la gastronomía y esposiciones de pintura. Como ye vezu, el sábadu parte de la programación va desendolcase en Corvera.