Arranca’l congresu “Ciencia, llingua y fronteres”

Espertos en llingüística y otres especialidaes debaten el 5 y 6 d'ochobre, sobre l'establecimientu de fronteres na diversidá llingüística dientro del congresu “Ciencia, llingua y fronteres”.

Ye'l tema a tratar nel congresu 'Ciencia Llingua y fronteres', organizáu pol Seminariu de Filoloxía Asturiana, que se desarrollará martes y miércoles na Sala de Conceyos del Departamentu de Filoloxía Española, na Facultá de Filoloxía de la Universidá d'Uviéu.
  
Ún de los organizadores, el profesor Ramón d'Andrés, esplica en declaraciones a Europa Press que "el tema de les fronteres llingüístiques ye un vieyu tema estudiáu pola dialectoloxía". "Hai fronteres llingüístiques na península famoses, como la del aragonés y el catalán, el gallego-portugués y l'asturlleonés, portugués y castellanu. Hai fenómenos de frontera interesantísimos", recordó.
  
Asina, señala que "ye un tema estrella de la dialectoloxía europea de los sieglos XIX y XX, pero munches veces suxetu a discusión, porque nun hai acuerdu ente los estudiosos sobre los criterios y trazos utilizaos". "Hailos hasta que planteguen que nun existen llingües, nin dialectos", añadió.
  
Espertos internacionales
Asina, destacó la conferencia inaugural, de Hans Goebl, de la Universidá de Salzburgo, espertu en dialectometría, el sistema diseñáu pa midir matemáticamente y estadísticamente la variación llingüística dientro d'un territoriu.
  
Calcó tamién en dos meses redondes. Na del martes, Eduardo Maragoto, José Enrique Gargallo y Antonio Meilán debatirán sobre la frontera ente'l portugués y l'español. Na del miércoles, Xavier Barcia, Xosé Miguel Suárez Fernández y Francisco Dubert fairán lo mesmo nel casu del astur-lleonés y el gallego-portugués, amás de presentar el proyectu Etlen, otru sistema de midición matemática sobre les variantes dialectales, aplicáu nesti contestu al occidente d'Asturies.
  
El congresu nun sólo cuenta con presencia de llingüistes. Habrá tamién un antropólogu, Adolfo García Martínez (UNED), un biólogu, Gonzalo Nieto Feliner (director del Xardín Botánicu de Madrid), y un filósofu, Luis Manuel Valdés Villanueva (Universidá d'Uviéu). D'Andrés esplicó la presencia d'ellos trés matizando que "la diversidá llingüística y la manera de clasificala son cuestiones qu'interesen a la llingüística y tamién a otres ciencies".
  
Actu inaugural
L'actu inaugural del Congresu contará cola presencia del rector de la Universidá d'Uviéu, Vicente Gotor, el nuevu decanu de Filoloxía, Jesús Menéndez Pelayo, y la directora xeneral de Política Llingüística, Consuelo Vega, ente otres personalidaes.
  
D'Andrés quiso dexar claro, a cuenta d'esti eventu, que "l'asturianu ye tamién un tema d'investigación científicu". "Na Universidá d'Uviéu nun sólo s'investiga en física y química, tamién n'humanidaes y en llingüística, y la llingüística asturiana ye una parte de la llingüítica", acabó.