Arnaldo estrénase con un llibru n'asturianu

La de La Ponte Castru presenta 'Nel ríu la fame', la so primer obra, en Tinéu.

Pilar Arnaldo cuenta nel llibru un momentu estraordinariu qu'ocurre na vida de seis muyeres: "una nena qu’alita gracies a l’acción sanadora d’un mineru fugáu; una madre a la que timen los señoritos de la villa por nun saber lleer, pero que ta dispuesta a que la historia nun se repita cola fía; una moza a puntu de parir que crucia sola, durmiendo en monte, la llarga distancia que separa la cárcel de la qu’acaba de salir de la casa onde quier que-y naza la criatura; dos enamoraes a les que l’amante abandona obligándoles a renunciar al amor pal restu de la vida... Y Gloria, recién casada, a la que casi maten de fame na casa que la acueye y qu’esplica a la nieta la reacción violenta que-y va cambiar la vida".

En definitiva, "seis llabradores nun tiempu nel que les families probes nun yeren ames del so destín, de cuando les muyeres taben condenaes a la obediencia y a la resignación. Seis protagonistes que viven na redolada del ríu la Fame, el nome popular del ríu Xinestaza, que son a sobreponese a la calamidá pa enfrentar la vida con determín y valentía y a les qu’esti llibru da voz".

La presentación de la obra editada por Saltadera va celebrase na tarde d'esti sábadu, a les 18 hores, nel Hotel Palacio de Merás de Tinéu. Nel actu Arnaldo va tar acompañada por Esther Fonseca y Marta López Fernández.