Armando Gutiérrez y Pablo X. Suárez llevaron el XVIII Concursu de Cuentos de Cangas

|
Mázcara del SNL de Cangas del Narcea

Van recibir el gallardón na Sumana de las Ḷḷetras Asturianas prevista pal mes de mayu.

El lleonés Armando Gutiérrez Rodríguez, ganador na decimosesta edición del concursu, repite na categoría de variante occidental nel XVIII Concursu de Cuentos Curtios del Conceyu Cangas gracies al testu 'Divina Providencia'. Pela so parte, Pablo X. Suárez lleva la d'estándar con 'Escritora de taces'.

El xuráu d'esta edición, conformáu por Laura Marcos, filóloga, docente, escritora y coordinadora autonómica de la Rede de Normalización Llingüística nos Conceyos; Pilar Arnaldo, filóloga, docente y escritora; Marta López, filóloga, docente y crítica lliteraria; María Cueto, filóloga, docente y investigadora; y Mónica Rodríguez, responsable del Serviciu de Normalización Ḷḷingüística de Cangas del Narcea, rescampló de los cuentos ganadores que tean escritos "cona corrección que da la experiencia literaria", con histories próximes "al nuesu propiu contextu bien fundamentadas ya desenvolvidas". Cada premiu ta valoráu en 500 euros.

'Divina Providencia' ta precisamente ambientáu en Cangas "ya conta cumo narrador testigu cono propiu Xovellanos", apunta'l xuráu. Mentes, el trabayu del escritor sierense ye "una narración más introspectiva ya centrada no devenir vital d'una persona mental ya psicolóxicamente confundida, pero cono propósitu firme de recomponese ya avanzar hacia la reconstrucción de la vida propia, abandonando, para eso, los ḷḷazos que la limitan".

Na semeya, una mázcara asoleyada pol Serviciu de Normalización Ḷḷingüística de Cangas del Narcea.

Contador Estadistiques