Arias presenta composiciones pa “dar a conocer la guapura de melodíes que tenemos nel folclor y que ta na tonada”

‘10 canciones asturianes pa gaita y pianu’ ye’l nome del trabayu que Xaime Arias ta acabante d’asoleyar con Trabe pa ufrir repertoriu pa gaita dientro del conservatoriu. Una obra de calter pedagóxicu que pretende “dar a conocer la guapura de melodíes que tenemos nel folclor asturianu y que ta na tonada”, afirma’l pianista mierense.

El salón de la Escuela de Música y Baille Tradicional Villa de Xixón acoyó’l vienres la presentación d’estes adaptaciones que siguen el camín de compositores asturianos como Baldomero Fernández, Manuel del Fresno o Eduardo Martínez Torner. Arias, acompañáu del gaiteru Carlos Casado, ufrió un conciertu colos temes que trabayó, siete procedentes de l’asturianada y trés del repertoriu tradicional.

“Dientro del calter pedagóxicu o didácticu que tien el llibru tán los niveles de dificultá. Hai pieces que son más cencielles, y otres que’l amigu Carlos igual s’alcuerda de min y de dalguien más”, bromió Arias, que tuvo como públicu muncha xente mozo de la escuela de la banda gaites xixonesa, dalgunos sentaos en suelu pola importante asistencia. L’oxetivu, poro, ye ufrir repertoriu de gaita y pianu y que los gaiteros qu’entamen conozan repertoriu de l’asturianada.

‘A la mar vanse los ríos’ foi la primer pieza qu’interpretaron Arias y Casado, a la que siguieron ‘Aúlla un perru, madre’, ‘Baxaron cuatro ayeranos’, ‘En toa la quintana’, ‘La mina y el mar’, ‘La mio neña’, ‘Si quieres que cortexe’, ‘Tu nun vuelvas más a mio casa’, ‘Virxe del Cébranu’ y ‘Yá sabes que tengo gaita’. Esto ye, los diez cantares nel orde nel qu’apaecen les partitures nel llibru.

‘10 canciones asturianes pa gaita y pianu’ naz de la collaboración d’Arias con cantantes d’asturianada como Liliana Castañón, Anabel Santiago, Rosario González, Sandra Álvarez o los hermanos Valle Roso, Marisa y Fernando, ente más otros, y la participación del conxuntu Axuntábense dientro del Conservatoriu Profesional de Música Anselmo González de Valle, d’Uviéu.

Na semeya, Arias, con Casado reflexáu nel espeyu.