Arias - Cachero nun entiende por qué sigue IX nel Gobiernu

"Recurrir les bases de la TV pa que se contemple l'asturianu nes mesmes ye cuando menos difícil" asina s'espresó a Asturies.com José Suárez Arias-Cachero "Felechosa" empresariu y representante de l'asociación de defensa de los derechos llingüísticos "Oficialidá". Pa Cachero'l recurrir les bases de les oposiciones a los puestos de trabayu nel Ente autonómicu de Comunicación con vistes a inxerir nelles el reconocimientu del asturianu ye difícil porque "nun tenemos un marcu d'oficialidá de la llingua y tamos amás, nel casu de la convocatoria de places, nuna situación na que nun tamos falando d'un casu de derechos individuales como pudiera ser el de que s'almitiere una tesis doctoral n'asturianu o'l derechu d'un particular a meter per rexistru públicu una documentación n'asturianu, onde si hai más base llegal pa reclamar".

Cachero mostróse pesimista con vistes a la presencia del asturianu na futura TV autonómica. Pal representante de "Oficialidá" la verdadera sensibilidá respective a la presencia del asturianu na TV cola que trabaya l'executivu asturianu resúmese nes declaraciones del Conseyeru d'Economía Jaime Rabanal, qu'afirmare la otra selmana que l'usu de los idiomes na TV "vien mandáu pol mercáu y pola sociedá" unes declaraciones qu'Arias Cachero calificó de "auténtica barbaridá"

La situación que se da lleva a Arias Cachero a entrugase "por qué Izquierda Xunida - Bloque por Asturies sigue nel gobiernu autonómicu". Pal empresariu "ta claro lo que va pasar cola TV por muncho qu'IX-BA tea en gobiernu" y píde-y a la coalición d'izquierdes más mano dura, afirmando que "Nesti asuntu nun val con dar una rueda de prensa desvinculándose del tema, y ye qu'equí nun val con amagar, equí hai que dar" una afirmación que lleva a Cachero a entrugase sobre la validez del gobiernu de coalición: "Si IX-BA son incapaces de sacar alantre unes bases curioses pa la TV, que me digan por qué tan en gobiernu". Una entruga pa la que'l mesmu Arias Cachero albidra la rempuesta en cuantes que nun ve "voluntá nenguna per nenguna de les partes d'arreglar la situación nin de dir más allá de la pataleta".