Argüelles tresmite a Fernández la so disposición a negociar unes cuentes p’aplicar polítiques d’izquierda

Javier Fernández recibió nel Palaciu de Presidencia al coordinador xeneral nuevu d’Izquierda Xunida (IX), Ramón Argüelles, que-y tresmitió la so disposición a negociar un presupuestu que sirva p’aplicar polítiques d’izquierda. La coalición va condicionar un posible alcuerdu al preste de la militancia.

Argüelles acudió al conceyu xunto con Gaspar Llamazarez, voceru del grupu parllamentariu, mientres que Fernández tuvo acompañáu pol voceru socialista, Fernando Lastra, y Dolores Carcedo, conseyera de Facienda y Sector Públicu. Esti alcuentru, amás de pa recibir institucionalmente al nuevu máximu responsable d’IX, foi’l puntu d’aniciu de la negociación de los presupuestos del 2017.

La postura d’IX pa evitar una segunda prórroga presupuestaria ye que les cuentes sirvan p’aplicar polítiques d’izquierda. “Que nun sía sólo un presupuestu de servicios sociales, sinón que tamién pueda xenerar puestos de trabayu”, afirmó Argüelles tres l’alcuentru.

Pela so parte, Llamazares esplicó que los númberos nun tán entovía zarraos, en primer llugar porque nun ye seguru’l marxe de financiación, qu’entovía tien que ser definíu pol Conseyu de Política Fiscal y Financiera. “Tamos énte un presupuestu llixeramente superior a la prórroga y, poro, tenemos un marxe de maniobra estrechu”, señaló pa depués plantegar una reforma fiscal superadora del error de saltu en sucesiones, con un modelo más progresivu y xustu, asina como la llucha contra’l fraude, comos pasos imprescindibles p’aprobar les cuentes.

Entruga a la militancia

Cualquier alcuerdu al que se llegue cola FSA va ser plantegáu a la militancia, según confirmó ayeri Argüelles. Foi tres la primer reunión dientro d’una ronda de contautos del coordinadora xeneral colos sindicatos qu’abrió Comisiones Obreres (CC OO).

Semeya obra d'Armando Álvarez. Na imaxe, Llamazares estrecha la mano a Fernández, con Argüelles detrás y Carcedo y Lastra nun segundu planu.