Argüelles insiste en que lo "sensato" ye negociar col PSOE "de 14 a 14"

El coordinador xeneral d'IX caltién la ufierta a Podemos pa negociar conxuntamente col PSOE los presupuestos del 2018. L'apuesta pol asturianu sería una de les llinies del alcuerdu.

El marcu de negociación partiría, esplicó Ramón Argüelles, de cuatro puntos básicos en materia de gastu: el social, con midíes contra la probeza enerxética, l'axilización del salariu social o vivienda; les polítiques d'emplegu y apoyu a la investigación, y el Desarrollo y Innovación (I+D+i); la sostenibilidá ambiental; y la llingua asturiana. "Hai unos años teníemos mieu a que l'asturianu desapaeciera; la verdá ye que nun desapaeció, pero creemos que nun tien l'impulsu suficiente. Tenemos que trabayar más pol asturianu", afrimó.

Nesi sen, apuntó que "dientro de les posiblidaes de l'Alministración" ve necesario "recuperar y fomentar el so usu, y averalu lo máximo posible la cooficialidá", ensin descartar "suxerir" una reforma del Estatutu. "Apostemos pol asturianu", encamentó.

Otra manera, entrugáu pol cambiu de postura de la FSA con respeuto a la oficialidá, el máximu responsable de la coalición destacó qu'una de les primeres coses que sintió a la direición nueva de la FSA ye que "per primera vegada queríen facer bandera de la nuesa llingua natural, que ye l'asturianu", puntualizando darréu que "el camín demuéstrase andando". Asina, señaló qu'Izquierda Xunida (IX) ta en contautu constante cola Academia de la Llingua Asturiana "pa proponer coses más concretes", que se van dar a conocer pronto, apuntó.

Posible medra de la derecha

Argüelles quixo dexar nidio que la ufierta de diálogu y negociación que propón IX ta orientada a llegar a un consensu pol que la coalición lleva apostando décades. “Cuando nos sentamos a negociar, sentámonos de verdá", esplicando de siguío que dicha propuesta vien acompañada con un proyeutu d'ingresos pa financiar les propuestes.

Respeuto a Podemos y al so plantegamientu de dir en solitariu a la negociación del presupuesto col PSOE, reconoció que-y sorprende la situación tanto pol fechu de qu'en Madrid yá esiste un grupu conxuntu como Xuníos Podemos, como por entender que “dir de tu a tu, de 14 a 14, ye más sensato". Por ello, caltién la so ufierta pa negociar xuntos y propiciar un alcuerdu de la izquierda qu'evite que se sienten les bases d'un posible gobiernu futuru del PP: “que naide se sorprenda de que la falta d'alcuerdu de la izquierda suponga una medra de la derecha”, enfatizó.