Argüelles considera qu'esiste una solución política dialogada con Llamazares

|
Argüelles considera qu'esiste una solución política dialogada con Llamazares

La dirección d'IX nun comparte nin el fondu nin la forma de l'actuación nes últimes feches del so voceru parlamentariu na Xunta Xeneral Gaspar Llamazares, actitú que xeneró discutiniu nel senu de la coalición.

Asina lo aseguró esta mañana en rueda de prensa'l coordinador xeneral Ramón Argüelles tres el rexistru de la plataforma Actúa como partíu políticu.  El coordinador d'IX d'Asturies esplicó, a entrugues de los periodistes que la dirección d'Asturies ta na llínea de la dirección federal d'IX y nel so proyectu políticu, “que ye'l nuesu”. Argüelles quiso tranquilizar a militantes, simpatizantes y votantes de que n'IX d'Asturies nun esiste riesgu de perder la so identidá nin de disolución.

Acompañáu por Alejandro Suárez, secretariu d'Organización, y Gabriela Álvarez, secretaria de Política Municipal, Argüelles dixo que l'actitú de Llamazares, hasta esti momentu, nun representa incompatibilidá nin infracción colos estatutos d'IX, a cencielles trátase d'una situación “desagradable”. Abogó pol diálogu para resolver los problemes. Por respetu a la figura de Gaspar Llamazares, los sos votantes y los militantes d'IX, el coordinador va caltener una xunta col voceru parlamentariu pa clarificar y que quede claro que nun se puede repitir esa circunstancia que xenera "desánimu”, y que-y va pidir que nun faiga declaraciones como voceru d'IX que nun tengan que ver col proyectu políticu del partíu que lu nomó, para evitar tracamundios con otres víes dientro d'IX.  “El voceru parlamentariu d'IX defende los intereses de la dirección y d'IX d'Asturies,” aseguró Ramón Argüelles. “Tien qu'haber con sintonía con esta dirección y creo que lo vamos a llograr”, dixo. Repitió'l pidimientu de tranquilidá porque anque que se trata d'una circunstancia “grave” ésta tien solución y “políticamente puede haber una salida colos dos condiciones mentaes enantes”.

Alejandro Suárez, responsable d'organización, pidió que dende la política y la tranquilidá empecipie un procesu de diálogu col voceru parlamentariu para atopar una solución política que tea “al altor de la nuesa xente”. “Tamos falando de persones con munchos años de militancia”, dixo na sede d'IX d'Asturies. Suárez esplicó tamién que l'escenariu nel que trabaya nun ye la desapaición d'IX, sinón en que'l patrimoniu políticu y personal d'IX.

A entrugues de los periodistes, Suárez sostuvo que nun ye sostenible'l tracamundiu na que s'entemecen posiciones polítiques de Gaspar Llamazares en Madrid colo que tien que ser equí n'Asturies. Ante la entruga de que si se planteen la dimisión de Llamazares como voceru, el secretariu d'Organización retruco que  “Non, trabayamos col convencimientu de qu'esto tien  solución, que les coses sigan como s'empecipiaron al entamu de la llexislatura, un bon candidatu, una bon resultancia electoral y una portavocia”. Ye necesariu modificar formes, maneres de comunicación y relación, dixo Suárez.

La dirección d'IX d'Asturies va axuntase nes próximes hores col voceru parlamentariu antes de tomar cualesquier decisión.
 

Contador Estadistiques