Areces ve "irracional" la propuesta del BNG pa que Galicia puea amestar conceyos asturianos

El presidente asturianu Vicente Álvarez Areces declaró ayeri nuna entrevista que-y concedió a Radio Asturias - Cadena SER que la propuesta del BNG, que propón que l'estatutu d'autonomía gallegu puea amestar a Galicia conceyos d'otres provincies abúlta-y "irracional". Areces declaró tamién que Galicia tien "un gran idioma maternu" pero que nel occidente asturianu lo qu'esiste ye "la fala o les fales" nes qu'hai "otres influyencies de los bables o del bable asturianu".

Areces ta convencíu de que "nun va haber problema nengún con Galicia". El presidente asturianu afirmólo asina dempués de que-y entrugaren na entrevista que-y concedió a Radio Asturias - Cadena SER pola propuesta del Bloque Nacionalista Gallegu (BNG) qu'apauta na so propuesta de reforma d'estatutu d'autonomía pa Galicia que la comunidá autónoma gallega puea amestar conceyos de "característiques culturales y históriques" asemeyaes a les gallegues y que pertenecen a comunidaes vecines.

Areces dixo que consideraba esta propuesta del BNG como dalgo "ensin base racional nin aceptación posible". El presidente asturianu, que reconoció que nun militaba en "nenguna ideoloxía nacionalista" pero que les respetaba "porque tan dientro del nuestru arcu parlamentariu democráticu n'España" afirmó qu'ente Galicia y Asturies hai una "convivencia de base que naz d'una historia común de munchos sieglos". No tocante a la cuestión del idioma, Areces calificó'l gallegu como "una llingua mui desarrollada que produxo una lliteratura riquísima" y como "una llingua materna con una potencia estraordinaria reconocida como llingua oficial y que nel marcu de la Comunidá gallega tien que tener tol sofitu que merez".

Sicasí, Areces negó qu'ello tenga que llevar a introducir la oficialidá d'esa llingua en comunidaes autónomes como Asturies "onde tenemos la nuestra fala, o fales na zona occidental". Con reconocer qu'hai "una influencia llingüística del gallegu" Areces dixo qu'hai "otres influyencies de los bables o del bable asturianu". Nel fondu de la cuestión Areces atalantó que lo único qu'hai tres d'esta polémica ye "esti debate tan artificial qu'hai n'España, el debate de les identidaes, qu'algama alcanza un voltaxe mui altu cuando se toca'l tema llingüísticu". El presidente asturianu,qu'anunció un próximu cume ente Asturies y Galicia "pa falar de temes que-yos afecten a los ciudadanos" dixo que yá tien falao d'ello col presidente gallegu Emilio Pérez Touriño y qu'elli "sabe que ye un tema que traten d'introducinos artificialmente como conflictu.