Areces solicita a Bruseles el mantenimientu de les ayudes a Asturies a partir del 2014

Vicente Álvarez Areces, presidente del país, pidió al Comisariu Européu de Política Rexonal, Johannes Hahn, el mantenimientu de les ayudes a Asturies p’avanzar na converxencia cola XE. Areces aseguró que van estudiar la so propuesta.
 
“Necesitamos siguir recibiendo ayudes pa dir na direición de los oxetivos que marca la estratexa 2020. Si hasta agora tuvimos munches ayudes en comunicaciones y en tresporte, tenemos que siguir recibiendo ayudes orientaes, por exemplu, a la innovación, a las polítiques que provoquen qu’Asturias sía competitiva. Nun tendremos necesidá de tantes infraestructures de tresporte, pero sí tendremos necesidá d’apoyu n’otres polítiques que nos permitan siguir buscando la converxencia con Europa", esplicó Areces tres la reunión celebrada en Bruseles. El presidente del país xustifica esta petición d’ayudes más allá del 2014 porque Asturies continúa “en transición".
 
Nel trescursu de la reunión, Areces tamién recordó a Hahn la necesidá d’introducir "indicadores complementarios" al PIB a la hora de midir el bienestar social na Xunión Europea y de tomar como referencia pa repartir les ayudes comunitaries indicadores "de tipu medioambiental y social", dalgo qu’aprobó por unanimidad n’ochobre’l Comité de les Rexones de la XE nun dictamen del que foi ponente Areces y del qu’entregó una copia al comisariu. "Un país pue tener un PIB razonable y llueu tener grandes desigualdaes interiores o tener unes polítiques medioambientales desastroses y como la inclusión y la política medioambiental figuren ente les prioridaes de la Estratexa 2020 ye una contradicción que se tenga una estratexa tan ambiciosa y que, per otru lláu, se sigan utilizando les ferramientes clásiques pa la distribución de les perres y de clasificación” que se basen esclusivamente nel PIB, esplicó’l presidente.
 
Otra manera,  tres l’alcuentru col Comisariu, el xefe del Executivu participó na sétima reunión de la Comisión de Mediu Ambiente, Cambiu Climáticu y Enerxía (ENVE) del Comité de les Rexones.