Areces quier afitar la elección ‘a deu’ de funcionarios

El Gobiernu asturianu quier afitar el “sistema deucráticu” en puestos del funcionariáu. Asina lo denunció’l Conceyu por Otra Función Pública acordies a lo recoyíu pol borrador que PSOE-IX quieren aprobar cola próxima llei de presupuestos.

Nel anteproyectu pal camudamientu de la Llei de Función Pública Asturiana s’establez la obligación de nomar pol procedimientu de llibre designación – “sistema del deu” como califica’l Conceyu por Otra Función Pública (COFPA)- a la totalidá de puestos de xefatura de serviciu, coordinadores y asesores y dellos otros más nos que se valore necesaria la concurrencia d'enfotu personal nel funcionariu escoyíu.

“Con esti anteproyecto de llei, el Gobiernu Areces propónse llegalizar pela vía rápida'l sistema deucráticu de nomamientos anuláu pola Xusticia asturiana en cuatro sentencies consecutives de la TSXA”, critica’l COFPA, qu’amás añade qu’esti sistema ye’l mesmu qu’aprobó el PP valencianu na so Comunidá Autónoma.

Como sociu del gobiernu asturianu, el COFPA define la posición d’IX de “especialmente delicada”, por mor de qu’esta organización defendía nel so programa electoral la necesidá d’acabar col clientelismu funcionarial.

Movilización popular
Dende’l conceyu de trabayadores públicos asturianos llamen a movilizase sindical y popularmente contra’l •control partidista de la xestión deucrática de los intereses xenerales d’Asturies”.