Areces participó per primer vez na llectura institucional de testos n’asturianu na Xunta Xeneral

|

Vicente Álvarez Areces participó esti miércoles per primer vez na llectura institucional de testos n’asturianu con motivu de la Selmana de les Lletres Asturianes. El presidente del Gobiernu d’Asturies recitó ‘Acabación’, de Mánfer de la Llera.
 
La participación d’Areces nesta cita habitual na Selmana de les Lletres sorprendió a toos porque nun lo fixera nes onces ocasiones anteriores y sí agora, xusto nel momentu nel que va despedise de la presidencia del país. Areces tomó la palabra de segundes, tres la presentación y llectura de la presidenta de la Xunta, María Jesús Álvarez, pa recordar a Mánfer de la Llera, del que destacó “los sos valores, el so compromisu y la so capacidá d'influyir nel mundu que-y tocó vivir”. Depués fixo la llectura de ‘Acabación’.
 
Amás d’Areces, tamién participaron nesta llectura institucional el conseyeru d'Educación, Herminio Sastre, que lleó ‘Con Rosa na carbonera’, de Carmen Gómez Ojea; el diputáu del Bloque por Asturies, Roberto Colunga (‘La muyer del mineru’, de Sabel Tuñón Ces); el diputáu del PP, Joaquín Aréstegui, (‘Dicíen’, de Ricardo Candás); el diputáu d'IX-Los Verdes d’Asturies, Jesús Iglesias (‘Acebache’, d'Iris Díaz Trancho); y el rector de la Universidá d'Uviéu, Vicente Gotor (‘Tradición’, de Vicente García Oliva). Tamién tomaron parte nel actu los trés fíos del poeta reconocíu na Selmana de les Lletres Asturianes: Efrén, Vital y Ramón d'Andrés Díaz. Los dos últimos lleeron testos del so pá, mentes que'l primeru quiso tener una alcordanza pa otru poeta desapaecíu, Nel Amaro, fináu hai malpenes un mes.
 
Hai que destacar que la mayor parte de los testos que se lleeron tán incluyíos nel volume 'Cuántu carbón saldría', que recueye testos d'autores asturianos homenaxando a Mánfer de la Llera, anque’l presidente del Conseyu de Comunidaes Asturianes, Manuel Fernández de la Cera, fiel al so estilu, se decantó por un testu d'ellaboración propia, escritu en fala occidental, nel que contó la historia d'un emigrante asturianu qu'acabó tamién trabayando baxo tierra, pero non na mina, sinón nel metru de Buenos Aires.
 
 

Contador Estadistiques