Areces nun ve que vaya haber problema p'aprebar los presupuestos pal 2006

El Presidente asturianu
Vicente Álvarez Areces tuvo ayeri en Cabranes, onde inauguró un nuevu edificiu de servicios y participó na reunión del Conseyu de Gobiernu d'Asturies. El Presidente ocupose na visita de dellos asuntos d'actualidá asturiana, ente ellos la reforma estatutaria, la venta de la empresa de tresportes ALSA y los presupuestos d'Asturies pal 2006.

En cuantes al primeru, el Presidente Areces declaró que "tamos abordando'l tema de la reforma del estatutu con absoluta prudencia" Como yá adelantare en Debate d'Orientación Política va delles selmanes, Areces esplicó que va entregáse-yos d'equí a bien poco a los Grupos Parlamentarios l'informe del "comités de sabios" entamando nesi momentu una consulta al Conseyu Consultivu y creándose "con toa probabilidá una ponencia parlamentaria qu'echaría a andar l'añu qu'entra. Areces, que nun dio fecha de pa cundo pue pesllase'l procesu de redacción del nuevu estatutu y dexó en manes de la Xunta Xeneral "onde a producise'l debate fundamental" la redacción d'un documentu qu'Areces definió como "preséu de xestión de los problemes qu'afecten a los asturianos y de los sos servicios".

En cuantes a la venta d'ALSA, el Presidente asturianu repitió la impresión positiva que yá manifestare en momentu de conocese la venta declaró que la entrada d'ALSA en National Express ye una noticia "importante" y enfotóse ota vuelta en que la empresa nun va perder la so "perspectiva asturiana".

Más priesa que col tema del estatutu tien el Presidente al falar del Presupuestu Xeneral d'Asturies pal 2006, siguiente puntu que podría poner a preba les rellacione colos sos socios de gobiernu. Areces dxo que'l Presupuestu va pasar per Conseyu de Gobiernu del miércoles qu'entra, 19 d'ochobre, enantes de la entrega de los Premios Príncipe d'Asturies, onde va aprebase nes llinies xenerales en que yá lu presentó en Debate sobre l'Estáu de l'Autonomía, y enfotóse en que d'ehí al mes d'avientu la Xunta Xeneral-y dea'l preste definitivu a un presupuestu que va tener una xuba del 8,2% respective al del 2005.