Areces nun cree que vaya francer el pautu de gobiernu

El presidente asturianu Vicente Álvarez Areces declaró nuna entrevista a Radio Asturias - Cadena SER que s'enfotaba en que la crisis abierta con IX-BA a cuenta del repartu de cargos ente PSOE y PP na procuradoría xeneral d'Asturies nun pasare "del ámbitu parlamentariu" anque apuntó que "diba ser grave que lu trescalare".

El Presidente asturianu alvirtió al dirixente d'IX y Conseyeru de xusticia Javier Valledor qu'había aselar el tonu de les sos declaraciones pero reconoció'l derechu d'IX-BA a amosar el so desalcuerdu col Gobiernu nel ámbitu parlamentariu. De cualquier manera Areces negó la mayor sobre les declaraciones de Valledor nes que'l Conseyeru de Xusticia albidraba que l'alcuerdu ente PP y PSOE pa repartise los cargos de la Procuradoría Xeneral podía ser el primer pasu pa otru entendimientu, el que llevare a dambos partíos mayoritarios a amagostar, al marxe d'IX-BA, una reforma estatutaria de mínimos. Areces dixo qu'esa nun yera una pretensión "nin del PSOE nin del Gobiernu".