Areces firma la convocatoria d’eleiciones a la Xunta Xeneral

Vicente Álvarez Areces, presidente del Gobiernu, firmó esti llunes el decretu pol que se convoquen eleiciones pal 22 de mayu. Los asturianos van escoyer 45 diputaos de la Xunta Xeneral: 34 pol centru, 6 pol oriente y 5 pol occidente.
 
El martes va publicase nel BOPA esta convocatoria d’eleiciones a la Xunta Xeneral d’Asturies y, polo tanto, va ser mañana cuando entre en vigor esti decretu, que tamién marca l’ainiciu de la campaña eleutoral pal 6 de mayu, a les 00 hores. El peslle va ser el día 21, a la mesma hora.
 
Mentes, los datos oficiales de les cifres de población resultantes de la revisión del Padrón municipal a fecha del 1 de xineru del 2010, con efeutos del 31 d’avientu d’esi mesmu añu, establecen los diputaos a escoyer en cada una de les tres circunscripciones nos que se divide’l país en términos eleutorales. Nesta ocasión se mantienen los númberos de les eleiciones del 2007 y los votantes de la circunscripción central van decidir los ocupantes de 34 escaños; los del oriente, 6; y los del occidente, 5. Hai que destacar que les tres circunscripciones tienen por llei derechu a dos diputaos; el resto, se reparte en relación a la población censada en cada circunscripción.