Areces diz que va retocar la partida acutada pal salariu social

La segunda xornada del debate sobre l'Estáu de l'Autonomía Asturiana valió pa escenificar la paz ente los socios de gobiernu al comprometese'l presidente asturianu Vicente Álvarez Areces a retocar los fondos acutaos pal Salariu Social, puntu de mayor resquiebra nos díes previos al debate al pidir IX-BA que nun s'acutare un presupuestu fixu pal mesmu, que dende'l PSOE asítiase en 60 millones d'euros pa cuatro años. Areces pidió que nun se ficiere del Salariu Social elementu de roce" a lo que la portavoz del grupu Izquierda Xunida - Bloque por Asturies Noemí Martín retrucó que'l Salariu Social ye un derechu que nun pue depender de la esistencia o non de presupuestu y pidió que se retirare presupuestu d'otres partíes como los proyectos na Universidá Llaboral pa da-y fondos a esti salariu. El portavoz socialista Fernando Lastra pesllo'l debate sobre'l tema asegurando "tolos esfuerzos posibles" pa llegar a un alcuerdu con IX-BA na tramitación parlamentaria del Salariu Social.

La portavoz del grupu Izquierda Xunida - Bloque por Asturies Noemí Martín plantegare estes demandes sobre'l Salariu Social nel so turnu de presentación de propuestes. La coalición d'izquierdes mayormente nun fizo otro qu'amestadures y matices a los planes que presentare ayeri'l xefe del executivu nes sos propuestes nel debate. Asina, énte la creación d'un plan d'emplegu xuvenil la diputada d'IX-BA solicitó qu'esti se mande pol criteriu de da-y preferencia al sector públicu n'aplicación del plan de manera qu'esti nun se convierta nuna subvención tapecida a la clase empresarial, al empar que reclamó qu'esti plan valga pa desaniciar la precariedá nel mundu de los becarios.

Otres propuestes d'IX-BA pasaron pela esixencia al ente mistu del suelu SOGEPSA pa que se faiga cola reserva de suelu precisa pa llegar al oxetivu de les 15.000 viviendes protexíes que se comprometieren en Pautu de Gobiernu. En materia d'educación, el puntu fuerte foi el refuerzu de la rede pública nel enseñu infantil de 3 a 6 años.


El mediu ambiente pesó na intervención de Noemí Martín que pidió qu'eche a andar la Estratexa Asturiana de Desarrollu Sostenible cola participación nella de movimientos ciudadanos y ecoloxistes. L'aplicación "contundente" del Plan d'ordenación del Litoral (POLA) pa torfar la especulación na costa, una política del agua alternativa a les grandes infraestructures, en referencia al proyectu d'embalse de Caliao (Casu) y una alternativa a la planta d'incineración de residuos que tien prevista COGERSA centraron esti puntu.


En cuestión de política llingüística la representante d'IX-BA pidió "la puesta en marcha urxente del Plan de Normalización Social del Asturianu" y l'afitamientu económicu de la Rede d'Oficines Municipales de Política Llingüística.

L'únicu puntu de resquiebra clara col sociu mayoritariu de gobiernu xunto col del Salariu Social abriólu Martín en referencia a los presupuestos d'Asturies pal 2006, sobre los que'l Presidente adelantó dellos datos en discursu d'apertura. Según Noemí Martín "IX-BA nun dan por zarráu alcuerdu presupuestariu nengún".