Areces diz que la propuesta del BNG p’amestar conceyos asturianos a Galicia nun tien consistencia

La propuesta que fai'l Bloque Nacionalista Gallegu (BNG) na so plantiya de reforma d'estatutu d'autonomía pa Galicia y na que se recueye'l posible pasu de conceyos de comunidaes autónomes vecines a la gallega abúlta-y al Presidente asturianu Vicente Álvarez Areces "inaceptable". Areces tampoco ta d'alcuerdu cola propuesta del BNG sobre normalización del gallegu nel occidente d'Asturies nin muncho menos cola pitición de "rectificación" que-y fexo'l líder del BNG y vicepresidente del executivu gallegu Anxo Quintana poles sos primeres declaraciones al rau d'esta propuesta, que calificó de "irracional".

Areces quitó-y pesu a la propuesta del BNG afirmando que nun-y ve consistencia a esti tema "pa que se caltenga más allá d'un par de díes nel debate políticu". Areces
Aseguró que nun tien falao d'esti asuntu col Presidente gallegu Emilio Pérez Touriño en cuantes que la polémica propuesta vieno d'una formación política y non del Gobiernu gallegu. Areces sorrayó tamién que'l Gobiernu asturianu tuvo conocimientu de la propuesta del BNG pelos medios de comunicación y que nadie nun-y dio parte de la mesma peles canales oficiales al executivu autonómicu. Colos que sí que dixo tener falao Areces ye colos conceyos qu'atiesten con Galicia, nos que dixo que-y consta que "nun tan esmolecíos por esti asuntu"


El presidente asturianu afirmó que'l Gobiernu asturianu nun va entrar en "nenguna negociación sobre llendes xeográfiques, nin por supuesto, contemplar la posible oficialidá del gallegu dientro d'Asturies". Areces recordó qu'Asturies tien una territorialidá apautada y definida dende va sieglos.

No tocante a la posible oficialidá del gallegu n'Asturies y la cuestión llingüística, Areces afitóse nes sos declaraciones de va dos selmanes, afirmando que nel Estatutu asturianu "defínese lo que significa'l bable y les sos variantes, col apoyu al so usu y espardimientu" amestando que "nel occidente asturianu tenemos una fala na que se sienten reconocíos plenamente los sos habitantes".