Areces descalifica l’asturianismu na réplica a Colunga

El Presidente del Principáu, Vicente Álvarez Areces, calificó de minoritariu al proyectu políticu del BA nel DOP. L’acusación, na que tamién los llamó mentirosos y oportunistes, foi na réplica a la intervención de Roberto Colunga.

"El so discursu débese a un oportunismu políticu claru, ta llenu de demagoxa y de mentires", espetó Areces al diputáu del Bloque por Asturies y voceru del Grupu Parllamentariu Mestu, Roberto Colunga tres les dures crítiques qu’esti pronunció nel Debate d’Orientación Política sobre la xestión d’Areces.

Areces recordó al BA que formó parte del Gobiernu, asociáu con IU-Verdes y al par de los socialistes, hasta'l mes de xunetu d'esti añu, nel que decidió separase y, a xuiciu del Presidente, nun ye esplicable que lo qu'antes "abrazaben" torne n'algo negativu.

Amás, refugó de planu l'argumentación de Colunga de que la so formación política nun cambia política por sillones. "Entós, ¿qué fai usté nesti sillón?", preguntó-y a Colunga, señalando que lo coherente sería que'l diputáu de BA dexara la Xunta una vez que rompió'l pactu de Gobiernu que tovía caltienen los sos compañeros de coalición, IU y Los Verdes.

"Tendría que tar realizando estos discursos n'otros foros muncho más minoritarios, que ye lo qu'usté representa", dixo Areces en crítiques al proyectu políticu asturianista del Bloque por Asturies."El verdaderu réxime ye'l qu'ustedes llantaríen si tuvieren mayoría", sentenció’l Presidente del Principáu.
  
Baxada de tensión de Lastra
Per otru llau, el voceru del Grupu Parlamentariu Socialista na Xunta Xeneral, Fernando Lastra, tuvo que dar por acabada, de forma prematura, la so intervención inicial nel Debate d'Orientación Política que se celebra nel Parlamentu asturianu al sufrir una baxada de tensión.
  
Tres poco más de cinco minutos de discursu, comunicó a los presentes que s'alcontraba mal y la presidenta de la Xunta propúnxo-y aplazar la so intervención, ante lo qu'él dixo que la daba por acabada.

El diputáu salió del hemiciclu y recibió asistencia del conseyeru de Salú del Gobiernu autonómicu, Ramón Quirós, y del diputáu del PP y voceru de Sanidá del so Grupu, Carlos Galcerán. La sesión viose suspendida polo asocedío.