Areces da anuncia de que ta preparando un executivu socialista y la FSA descarta que vuelva a negociase con IX-BA-LV

El presidente asturianu en funciones, Vicente Álvarez Areces, afirmó ayeri que yá ta trabayando na formación d'un gabinete socialista dafechu dempués de que "escosaren les posibilidaes de llegar a un alcuerdu con IX-BA-LV". Areces asistía ayeri a la reinaguración de la torre de la Universidá Llaboral, en Xixón, onde comentó que llamentaba que nun se pudiera llegar a un alcuerdu que-y diere más estabilidá al Gobiernu".

Con too y con ello, Areces, que se prepara pa gobernar ensin mayoría absoluta, declaróse partidariu de siguir diálogando a lo llargo de la llexislatura y anunció que l'acción de gobiernu va siguir l'alcuerdu programáticu al que se llegare con IX-BA-LV enantes de que les negociaciones ente dambes formaciones francieren la negociación pal pautu de gobiernu.

Mientres la dirección de la FSA niega que puea dialogase más y en tou casu caltién a IX-BA-LV la ufierta que refugare, la diputada d'esta coalición, Noemí Martín declaró ayeri que pa la so formación la meyor opción sigue siendo un gobiernu plural d'izquierda, ufiertándose a "falar y siguir negociando" cola FSA-PSOE. Sicasí, la diputada alvirtió que tien de ser la FSA la que dea'l primer pasu pa recuperar un diálogu al que nun-y ve traza y adelantó que los cuatro diputaos de la so formación van abstenese na votación d'investidura de presidente que ta puesta na Xunta Xeneral pal próximu 5 de xunetu.